Beidawn chang kha ka nei ve deuh ṭhin Part - 1

A nia sin, khatia kg 91 lai mai a rit ka ni tih ka in hriat khan, BMI ka han chhut a, overweight ah pawh ka rih tur let 2 deuh thaw a ni tawh tih ka hre thei a. Thau luat avanga natna kentel tur a neih zawng zawng khan min bawm nghal.  

Ka taksa a chaklo a, lu na, lu hai, luak chhuak, ngal vung etc ka neih phah bawk. BP sang nei sa ka ni a, ka eizawnna lah hi che lova nileng a ṭhut ngai chi a lo ni bawk si. Rei vaklo ah zunthlum ka nei ang tih ka in ring.

 

Ka rilru a awm hmasa ber chu cher ka ngai tih kha a ni. Ka BMI a normal weight chu Kg 62 a ni a, chumi tur chuan nasa taka ka weight ka paih a ngai. Excercise lak ka mamawh a ni.

 

Exercise chu ka la ve ngei a, ka rih em avangin nasa takin ka la ngamlo a, hah tham a chak erawh chuan ka kal ṭhin a, vanduaithlak takin Tlawva Mini Hydel Project power pekna hrui siama kan vahchhuahna ah kham ko atanga ka chhuk ka chesual a,ka ke rek ruh ka rap pelh a, excercise ka lak zawm thei talo. Damdawiina ka ke Xray tir pahin doctor hnenah chuan, exercise ka lak theih tawh dawnloh avangin cher na damdawi min chawh mai turin ka ti a. Doctor chuan nui chungin cherna damdawi a awmloh thu min lo hrilh a, ka bei a dawng teh e.

 

Doctor chuan sawi zawm in, cher i duh chuan Dietician number ka pe ang che, i rawn dawn nia min ti ta a. Ka thla a ti muang huai thei nia. Chu thu chuan keimahah beiseina thar min pe a. Ka rilru a thau paih tura min zai mai thei tur zawn pawh chu chu thu ka hriat avang chuan ka cancel nghal a. Tichuan cher tur chuan ka inbuatsaih chho ta a. 

 

Cher duh si, exercise la thei bawk silo chuan cher dan kawng chu ka dap ta a. Nikhata chaw vawi 4 ei ṭhin khan thla khat chhung kha Oats chauh ei in nikhatah vawi 2 ka ei ta a. A tir chuan ril a ṭam duh kher mai. Amaherawhchu min fuih tu hian  i taksa khan chaw a mamawh lo a, rilṭam anga awm tir tu che kha i thluak a ni a, kha kha i hneh hmasak a ngai tiin min hrilh a. A tir thla hmasa ber chu a harsa khawp mai. Mahse cher ka mamawh a, harsa mahse ka bei hram hram a ni, ril erawh a ṭam a, chaw ei chak ngawih ngawih in ka awm ṭhin. 

Read more »

Nunna thar Mizo Film | An tihsualte Part 1

 Mizo Film lar tak mai, Nunna thar tih film la enlo tan leh en tawh te tan pawh a film a an tihsual te Part 1 na lo en rawh le.

Read more »

Lirnghing vangin Fiaratui (Vaphai) a nu vek

 

Read more »

Kolasib thisen enfiahna

 

Read more »

Kolasib ah thisen a luang ringawt

 

Read more »

New York Gang leader chunga thil thleng mak chu

Read more »

Covid 19 treatment, Blood Plasma?

Read more »

Coronavirus (Covid-19) Vaccine

Tunlai khawvela hri leng Coronavirus hi tun dinhmunah a tihdamna damdawi bik mumal taka hriat a la ni lova, damdawi chi hrang hrang enchhin chhoh zel an la ni a. Tuna an damdawi hman ho pawh hi damlo an pek tam dan azir leh chumi atanga dam an tam dan azirin hman tlak a nih leh nihloh a la chiang thei chauh dawn a nih hmel.

Chutiangin tun dinhmunah Corona Virus Vaccine tak hi a la awm lova. Scientist te chuan siam thei tawh anga in ngaiin tunah hian mihring ah enchhin mek ni awma sawi a ni. Hei vang hian lo lungmuan ngawt tur pawh a ni chuanglo a, mi sang tel an enchhin hnu ah a result atangin chiang taka la hriat theih chauh tur a ni.

Tin, mihringa an test hian mihringa effect a neih dan leh a thawh zui dan tur te, a hlauhawm thei em tih te, huat zawng nei tan eng angin nge a thawh tih zawng zawng te an zir hnu ah vaccine a pawm theih turin an buatsaih anga, mihringin kan hman theih tur chuan kumin chhunga an siam hman a nih chuan a lawmawm lama ngaih tur a ni an ti chauh mai.

Tun dinhmunah Covid-19 vaccine awm rihlo mahse, in ven theihna kan nei a. Chung te chu :
1. Khawlai a chhuah loh
2. Kut silfai that, sahbawn nen second 20 tal.
3. Kan chhuak a nih pawhin mask hren tur.
4. Kan chhuak a nih chuan midang nen meter 1 tal a in hlat tur.

Heng ho hi tun dinhmuna kan in ven theihna a ni a, zawm hram pawh kan tum dawn nia.

Read more »

Youtube Channel thar

Ka youtube channel hmasa a buai avangin a thar ka siam a, video tam zawk nen ka lo let leh e. A hnuai ami hi link a ni a, lo subscribe duh tan.

Thiam zirna

Read more »

Halleluiah Chorus & Amen

Khawbung Kohhran Zaipawl in kum 2015 Tuipuiral Presbytery inkhawmpui, Khawbung Kohhran-a neih ah khan Halleluiah Chorus leh Amen hla inzawm hi kan sa ve a. A ropui dangdai ve khawp mai.

Halleluiah Chorus hi hmun hrang hrangah kan sa thei deuh fur hlawmin ka ring a. Amen hla tak erawh hi chu a hla thu a tlem viau a, AMEN tih zawng anih laiin a har em em mai a. Keini ang thingtlang khua atanga sak atan chuan ropui ve tak a ni.

Read more »

In ek mawi siak thu

Hmanlai hian lal ropui tak mai Akbar-a hi a awm a. A lalram a zau in thil a ti thei hle mai a. Akbar-a chuan khawnbawl upa fing tak mai Birbal-a a nei a. A fing in rorel a thiam a, Akbar-a pawhin a hmingthan pui in a chhuang em em thin a.

Nikhat chu, Akbar-a chuan Birbal-a aia fing nih a duh ta a. Birbal-a ngaihtuah chhuah theih ni miahlo tura a rin 'IN EK MAWI SIAK' ah a cho ta tlat mai a. Birbal-a chuan chu cho na chu a pawm ta a. A tuk zing a in ek mawi siak tur chuan an in then ta a. Chu thu chuan Akbar-a ram zau tak pawh chu a luahkhat ta nghal a.

Chumi tlai chuan lal Akbar-a chuan a ek mawi nan chawhmeh chi hrang hrang, Artui te, sa chi hrang hrang te, leh chawhmeh tui tak tak mai a ei teuh mai a. A chawhmeh tui tak avang chuan a ek pawh chu a mawi hle in a ring a. Tichuan,"Naktuk zing ah chuan mi zawng zawng in Birbal-a aia ka fin zawk thu hi an hria ang a, min ngaisang lehzual sauh ang," ti rilru chung chuan tui takin a mu ta a. Birbal-a erawh chuan ngun taka a ngaihtuah hnu in ei tur chikhat chauh a ei ta a.

A tuk zing ah chuan mi tam tak chu Lal leh Birbal-a in ek mawi siak en tur chuan lal in tual ah chuan an lo kalkhawm ta a. Akbar-a chu intithei tak chuan a e hmasa ta a. A ek chu mawi hle tura a ngaih laiin a thil ei pawlh hnem lutuk avang chuan rawng chi hrang nalh lo zet hian a e tial ta ruai mai a. Birbala chu a e ve ta a. Mawi takin a e eng(yellow) ta pial mai a. Tichuan Birbal-a ek zawk chu mawi zawk a thlan a ni ta a.

Akbawr-a chuan,"I finna hi tu ma phak rual a ni love, i ek mawi nan hian eng dawi thil nge i hman?" tiin Birbal-a chu a zawt a. Birbal-a chuan eng dang a chhang lo chuan,"Aw lalber, ka ek mawina thuruk chu 'MAI' hi a ni e," a ti ta a.

Mai hi ek mawi nan mai nilo, mit tan te hian a tha em em mai a. Chuvang chuan lo ei nasa lehzual ang che. :-D

Read more »

Vawiin ka pianchampha

Ekhai, kan ti nek nek a, ka birthday a lo thleng der  mai. Ka birthday ka lo theihnghilh hmin thak tawh a, fb lama ka thian fel tak pakhat in a hun thlen hma in min rawn hrilh hre hlauh mai a, ka lawm khawp mai. Tichuan blog update na tur hrelo a ka hawi hil reng lai chuan piancham post ka neih phah ta anih hi.

Kan naupan lai kha chuan ka nu leh pa te hian ka birthday min lawmsak thin a. Ka birthday apiang hian vawk an talh ziah thin. Kum 5 ka tlin thleng khan vawk min talh sak a. Kan thiante bakah kan chhungte leh thenawm hnai ho kan sawm a, chaw kan ei khawm mup mup zel thin.

Birthday ah khan thla kan la ngei ngei bawk thin a. Kan thlalak ah hian single a kan lanna tur ah pawh hian kan thianpa Lalzaia hi khawi emaw lai ber ah hian a lo lang ve hman ziah thin.

Kum 2? lai mai ka lo ni ve ta reng mai. Pathian kaihhruaina ka dawng a, khawtlang ah pawl hrang hrang ah chanvo pawimawh tak tak ka chelh ve ta nual mai. Kan khua ah phei chuan keimah ang rual zingah ka chanvo chelh ang chelh ve hi an awm kher lovang. Ka fel bik vang leh ka tlin bik vang ni miah lovin, Pathian min hruaina vang liau liau a i tih ka hria a, ka lawm em em a ni.

Amaherawhchu naupang te ni si, chanvo pawimawh tak tak chelh ve kan nih avang te, tin ka hmel hi a lo lang naupang em em lemlo bawk nen, upa ta viau anga min ngai an awm thin a. Min hrechianglo phei chuan keimah ang rual te pawh hian min PU lauh lauh thin a. A nuamlo ve duh khawp mai.

Engpawh nise hetiang kum thleng a damna leh hriselna min petu Pathian chu fak in awm sela. Pathian venna a zar ah Damdawiin ah damlohna avangin zan khat chiah ka la riak ve a. Jail ka la tang lova, tun dinhmun ah ka hriselna a la tha hle bawk. Heng te avang hian ka lawm em em a ni.

Tin, thian tha tak tak, ka birthday min lawmpui tu te bakah, ka blog min lo tlawh sak thin tu te zawng zawng chungah ka birthday ni hian lawmthu ka sawi mawlh mawlh bawk a ni e.

Eng pawh chu nise, vawiin ka birthday ni hian birthday lawm nan ka meihawl rawh ka thur dawn tih ka sawi ve mai mai duh a. Zan lamah kan Branch YMA chanchinbu enkawltu, ka thawhpui te nen a lawmna programme siam kan tum bawk. Tin, Sangpuii nu nen pawh a special te pawhin kan lawm ve mahna...:D

HAPPY BIRTHDAY

Read more »

Thil dum ka um

Zan chu thlasik boruak avang chuan a vawt ruih tawh a. Kawlphetha lam kan neihloh avang chuan a reh hle mai a. Ka phone chu ka sik neuh neuh a. Ka chhungte chu an mut vek tawh avang chuan a reh lehzual a, a chang chuan awmpuitu nei tlat te hian ka in hre thin a. Mahse kan enchian chuan keimah chauh in ka awm tih ka hrechhuak leh thin.

Kan in ep lam ruam ah chuan sihal chu an 'U' leh ruah ruah thin a, Chingpirinu hram pawh  chiang takin a hriat theih a. A khat tawkin khawlai ah chuan ui bauh ri hriat tur a awm zauh zauh bawk a. Infiam ve niawm taka rawn in um kawi zawr zawr chang te pawh an nei thin a. Mahse a reh em avang chuan chung thawm te chu khua tihar lo tu an nih ve tlat avang chuan ka beng ah chuan bengchheng thawm in a ri lova, ka khawhar min hnemtu ah ka ngai ve mai a.

Thli lah chu na vaklo hian a thaw heuh heuh a, thla lah chu a eng tha in vanlaizawl ah chuan diptu nei miahlo hian a engno chek a. Mahse thla eng pawh chu rilru ah a lang lem lova, ka facebook khawih lai mek chuan ka lung a len zawk tlat pek a. Chuvang chuan thla pawh chu lo eng raw sek sek, lung a leng tlat lo.

Chutia chu zan reh tak maia ka phone hmanga ka FB melh melh lai chuan ka phone battery chuan a tlinlo ta a, WARNING rawn pe in a ri ta tlung tlung mai a. Chumi lai bawk chuan thli thaw pawh chu thawklehkhat ah a reh duk a, van a chhum lengvak in a hliah vang nimaw, thla eng pawh chu a mit sulh mai a. Chutih lai tak chuan pawn a kan choka ah chuan thawm ring tak mai a lo chhuak a, a rik hian a ri rum rum mai a.

Chu thawm lo chhuak chuan a tir ah chuan min tih phut em avang chuan ka chesawn mai lova. Zawi muang a tho in kawngka chu ka hawng dek dek a, boruak chu a hma aiin a vawt zual ta sauh bawk hian ka hria a. Ka chhungril ah chuan ka mur er er a, ka khur ru bauh bauh bawk a. Kawlphetha eng a awmloh avang chuan thui tak ka hmu theilo a. Ka phone ka hmet eng leh chu battery low avangin a thi hmak bawk si a.

Chutia ka en lai tak chuan thil dum hi chak takin a rawn chhuak phei phut mai a. Ka phu zawk a, enge a nih a, hlauh tur nge hlauh loh tur tih pawh ngaihtuah chiang hmanlo chuan chak takin ka tlan chhuak ve tawp a, ka um zui nghal a. Kan huan sir kawng kawi a a tlan liam puat chu ka hmu hman vuai a.Chutah chiah chuan a ni THLAHRANG a nilo tih ka hriat na chu.

Khami zan khan choka ah sa ka rep a, ka sarep chu ka lo seng theihnghilh pek a. Zawhte dum hnar fing tak khan lo hria in a rawn pan chat mai a lo ni a. Ka sa rep chu a la hman chiahlo na in ka phut nasat em avang chuan thin a rim ve lek lek mai.

Read more »

Chemte thlawk thei kan nei

Kan naupan lai khan CHEMTE THLAWK THEI kan nei thin a. Kha kan chemte thlawk thei avang khan thiante zingah pawh kan lar hle a. Tin, hlauh pawh min hlauh phah a. Keimahni rual tawk ah khan kan chemte thlawk thei neih thu kha a lar em thin avangin kan khua ah kha chuan naupang zawng zawng khan min hre vek a ni ber mai.

Kan khaw mawng lam naupang 'Chhanala' chuan a pu Nawla'n Bittol(Pistol) a neih thu a sawi pawh kha a lar viau na a, khang hunlai naupang ho khan pistol te chu cowboy Sudden-a te ho thawnthu vang khan kan hre hlawm viau tawh a. Chuvang te pawh chu a ni mahna, Pu Nawla Bittol aia kan Chemte thlawk thei a lar zawk na chhan pawh chu.

A nia lawm, khang hunlai khan cowboy ho vanga Pistol te kan lo hriat ve hle hlu tawh a, in draw lai te kan mitthla a, naupang pawnto thlenga Sheriff lo nei ve thin khan, Chemte thlawk thei ber kher hi chu kan la hre ngailo a. Khang hunlai a kan neih bak kha kan khua ah phei chuan tun thleng hian nei an awm thawm sawi tur pawh a awm lo. Hmun dangah te hian lo nei ve khiah te chu an lo awm ve mahna.

Khang hunlai kha chuan Indian kan nih leh nihloh lam kan sawi vul ve lek luk lova, hnam a chian leh chian loh lam kan ngaihtuah ve ngai heklo. India kha kan tan em em ringawt mai thin a. Bom mitnei te, atom bomb te, jet fighter te kha India khan kan ngah hian kan han hre khawp a. Thingtlang kilkhawr, electrict pawh luh mumal loh na hmun atang khan USA te chu kan cho em em mai thin a. Indo pawh ni ila India chu kan chak chiang sa ah kan ngai a, kan lo in tithei ve em em thin a. Chutiang khawp a India ram kan ngaihsan ai aia nasa chuan kan khaw naupang ho chuan kan Chemte thlawk thei avang chuan min ngaisang zawk a ni.

India han sawi tak ah chuan India kha kan han tan na thei thin khawp a. Kan khua ah khan Burma lam atanga rawn pem thla, sikul rawn kal ve thin kha a awm a. Insual a hrat in a kawlh si a, kan class a kan mipa lian ber nen khan an in mil lo lutuk a, an insual reng mai thin a. Keini ho lah chuan an insual tawh chuan, "India leh Burma an in do ve," kan tia, kan au dur dur mai thin a. India kha chu tan vet vet tak kan ni. Tun lai ah Indian ka ni lo tih vel kha kan nei ve lova, Indian kan ni e tih pawh a awm chuang lova. India kha kan tan em em ve tawp mai thin a ni. Ram leh hnam ah kan la chiang phak velo te pawh a ni mahna!! Nge kan lo chiang zawk daih?

Kan chemte thlawk thei kha a tha mai mai khawp a, khang hunlai ah kha chuan silai ai pawhin a tha in a hlauhawm daih zawk tih kha naupang ho zawng zawng khan an hre vek. A chhan chu kan hmanraw tha neih te kha lar tir kan duh a, midang htiattir kan duh chuan a thatna zawng zawng bakah dawt tlem belh a fak chawp kha a ngai thin tlat a ni. Khang hunlai naupang zawng zawng chuan khatiang a dawt tlem belh kha kan ching vek. Tumah in dem thei pawh kan awm lo. Engemaw chang phei chuan dawt sawi thiam apiang kan ngaihsan hunlai te pawh kha a awm a nia.

Kan chemte thlawk thei khan huhang a ngah bawk a a hmel la hmu miahlo pawh khan an hlau em em mai a. In tih thiamloh nikhua pawhin chemte thlawk thei kan sawi chhuah zeuh chuan bawkkhup in chibai min buk lo chauh zel a nih kha. A lar avang khan kan roh em em bawk a, mi nazawng en pawh kan phal lo. En kan phal sak te pawh kha an khawih chhin kan phal lova, an en chiah kan phalsak thin.

En tur pawh khan man chawi a ngai a. A man pawh kha a sang larh mai. India tangka khan kan nunah awmzia a nei lova. Siki a sweet mum tam tak kan lei theih hunlai kha a ni a. Pawisa kha keini tan chuan engmah a ni lo. Nei teuh pawh ni ila society dawr a sweet mum sen, lian bel bul lei nan bak hman na tur kan hre chuanglo. Khatiang taka pawisa kan mamawh loh avang khan kan chemte thlawk thei en manah chuan tui thak (meat masala rim nam ngat) te, sephung te, tangtial te, thlangdar te kha en manah kan la thin. Keini tan chuan pawisa aia hlu zawk a ni tlat. Thenkhat chuan chhuat min nawh sak te, tui min chawi sak te, school atanga kan in thleng a min puak haw te khan an en hlawh bawk. Kan venga naupang huai ber erawh chuan buaina ka neih apiang a ka ai awh a rawn inpe in ka en tir ta a. Ka bodyguard ah a tang nghal bawk.

Pakhat in a en chhin tawh kha chuan kan sawi bak tlem phuah belh in midang bul ah khan an sawi chhawng leh a. A la en ve lo te phei chuan en an chak em em thin. Keini lah chuan kan roh em em a, en duh an awm a, en man an neih pawhin kan en tir phal lawklo thin a. Chu chuan a ti hlu em em thin. Tin, a en tawh te pawhin a hnu lama en ten an sawi dan a danglam zel avangin en nawn leh an chak a, chuvang chuan vawi khat mai duh tawk lovin an en nawn fo thin. Chuvang chuan tlawn pawh kan hlawh a, a rei deuh hnu phei chuan a free a en thei chin kan siam a. A free a en duh kha an tam khawp a, hna thawk ah khan kan chhawr ngheng zel mai thin a.

Umn... a thui lutuk palh ange. He kan chemte thlawk thei hi Japan ral len laia ka pu (ka pa pu) rawn hawn a ni a. Kan chem hmuh thin pangai ho nen a inan loh avang hian a dangdai hle a. Chemte thlawk thei tih pawh hi awm ve tak a ni. Chu kan chemte thlawk thei chu ka pu atanga in rochung chhawng zel kan ni a. Chu chem chu Vai ho KHUKRI hi a ni e.

Read more »

CFL Hmingthanga

Mizo Hlakungpui Mual website buaipui in September ni 9, 2012 zan ah chuan ka thu kar mai a. A tuk lam hna thawh duh bawk nen, zan dar 10 vela mut mai tum kha ka net lam speed muan em avangin dar 10 chu ka pel chiang hle. Chutia thil dang ngaihtuah map lova ka awm lai chuan dar 10:30 velah chuan kan Branch YMA Information chu an rawn ti ri kauh kauh a, kan branch president chuan he chhiat tawh thu hi a rawn puang ta a.

Ka hriat tirh chuan zaithiam lar hi a ni tih reng reng ka hre miahlo a. Chutia khual khua atanga mitthi awm ta chu kuang siam te a ngai dawn sia tiin ka thil tih lai chu ka dah a, damdawiin lam pan chuan ka chhuak ve ta nghal a. Chutia ka kal kawng ah chuan a ni Zaithiam lar CFL Hmingthanga kha a ni tih ka hriat tak chu.

Zaithiam lar CFL-a ngei kha a ni tih ka hriat tak ah chuan amah hi Aizawl lam mi emaw ka lo ti leh char char pek a. Aizawl lam mi ni si helam ah, Mizoram khawchhak kil tawp thingtlang khua a a rawn thi ta mai chu mak ka ti hle a, ka sawichhuak lem lo hlauh kha ka vanneih pui ta. Sawi chhuak ila chuan ka kalpui te khan bengvarlo min va ti dawn em!! Damdawiin kan thlen thlak hnu ah a hming an tar chu ka en a, chuta tang chiah chuan Samthang khua a ni tih ka hriat tak chu. Bengvarlo theih heih heih khawp mai.  

CF Laihmingthanga hi Ni 7.9.12 khan Khawbung PHC ah admit a ni a. TB leh zunkawng natna hmuhchhuah a ni. Theihtawp chhuah a enkawl a nih hnu in Ni 9/9/'12 dar 10:25 pm khan Khawbung PHC-ah a boralin a ruang hi a tuk zing dar 1:00 am khân an mahni khaw lam Samthang panpui a ni.

CFL-a hi kum 1970 November ni 5-ah Samthang khua ah a piang a. Khamliana(L) leh Tâwksungi(L) fapa a ni. Naupang fel leh lehkha thiam thei tak a ni a, rokhawlhna avangin lehkha hi Pawl 6 thleng chauh a zir a. A hla thenkhat-ah te phei chuan Saptawng te pawh a tel ve nawk nawk bawk a. A thlen phâk tâwkah chuan mi vengva ve tak a ni.

Zai mai bakah hlaphuah lam pawh a ti mi viau.. Hla hi 150 chuang zet a phuah. Naupang kum 15 vel anih atangin a zai tan tawh a. Zoram pum huap a a lar na chu 1993 June thla a 'Ngaihlai Masang' tih cassete a release atang khan a ni. A zai(aw) hi All India Radio-ah te khungin Music Video leh Audio Album 13 zet a siam bawk a. Music lamah hian a tuiin Tuipuiral huap zai intihsiakah te lawmman a la fo tawh bâkah Tuipuiral Beat Contest an neih ṭhin lai pawhin Lead Guitarist a lo ni bawk ṭhin.

A thih thu hriat a nih vêlah hian amah lainattu ṭhenrual ṭha leh khawtlâng, YMA nula tlangvâl te chu Khawbung Damdawiin lam panin an tlân a, ka zuk thlen thlak ve meuh chuan damdawiin tual vel ah chuan mipui an lo zi nauk tawh hlawm a. Tichuan he khawvel a CFL Hmingthanga ka hmuh hmasak ber leh hnuhnun ber na ni turin damdawiin khum a a lei taksa mu bam chu ka va thlir ve zawk a. Han tih theih vak dang ka nei tawhlo bawk nen, kan section ah a kuang hi siam tur an lo ti bawk nen kuang siamna lam panin ka kalsan ta a. Kuang siamna lamah pawh a zai nei tawh phawt chuan an play a ni ber e, a ri sup sup mai.

Khawbung Branch YMA te'n kuang siamin Samthang lam panpui turin an in buatsaih ta a ni. Zinglam 1:00pm velah an khua Samthang hi ama hla play chungin panpuiin 'Tuipuirâl Lelte' tia koh ṭhin chu ropui takin an khua Samthang chuan an lo hmuak a ni.

CFL tih hi a pa Chhangte, a nu Fanai hnam hming hi a kaikawp niawm tak a ni. L hi chu a hming taka 'Lian' hmingthanga tih aṭanga a lâk a ni thung. 

A hla sak te hi ama phuah deuh vek a ni a, Cassette Vol-I atanga X thleng a siam tawhah hian ama phuah deuh vek a sak avangin hla 100 chuang zet chu a phuah tawhin a lang. A cassette siam tawhte chu :

1.Ngaihlai Masang

2. Roosena Hmeltha

3. Chhânlet loh Hmangaihna

4. Kũr diam diam

5. Min hriatchhuahtir

6.Lâm dun ang aw

7. Tunge hmeltha ber

8. Hlim la, nui rawh

9. Hla inchhang special 10.Lemchanna Khawvel

Heng a cassette siamte hi kum 1993-2000 inkara a tihchhuah vek an ni.

[ Ref. : Mizo Zaithiam Larte Chanchin by Lalthlamuana ]

C.F.L-a hla thenkhat han tarlang ila:-

1. Bawihte nangnen

2. Chhan let loh hmangaihna

3. Chhuahtlang hmun hlui

4. Duhaisam a kim

5. Dawn tisei

6. Hmangaihna rose par

7. Hmangaihin hmangaihna

8. Hmangaihnaa phuar

9. Hmangaih CFL

10. I mawi chuang e

11. Intawng leh ngei ang aw

12. I tan ka lo kir leh

13. I tlai lua

14. Ka star no.1

15. Ka D tawn hun tur

16. Ka lung a leng mange

17. Kan duhaisam

18. Ka nau vala

19. Ka thian ngaihawm

20. Ka thianghlim tawh lo

21. Khuavang kallai

22. Khuavang chhinchhiah

23. Kan hlim laini

24. Ka hmangaih ber i ni

25. Lanu lungmawl

26. L.D.Hmeltha

27. Min kal san suh

28. Min thlahliam ang che

29. Mitthla alang hlimthla

30. Muttui mangtha

31. Min hriat chhuahtir

32. Nang chauh ka hmangaih che

33. Ngaihlai Masang

34. Phu loh 'D' chhai zawnga ho mai mai

35. Phu loh dawn thar

36. Rauthla 'D'

37. Thang nuihiauvi

38. Tawn ni i awm si lo.

39. Then che ka hlau ber mai

40. Then lohna ram

41. Tah loh mittui tlak

42. Valtin lawri

43. Zo nun mawi

44. Zawlaidi

45. Zokhaw tleitir

46. Kur diam diam

47.Roosna Hmeltha

Etc. etc.etc.

(Note:- A thlalak hi ka phone in ka la ve na a, a thim lutuk a. Pu Mapuia Hnamte lak hi ka rawn dah mai e.)

Read more »

Ngaihzawng ka nei ve a - II

Part I chhiar lo tan hetah hian chhiar tur a awm.

Ka zei mah mah em?

Chutia kan zei ve tak ah chuan zan tin mai hian ka zei zing ta telh telh mai. Bialnu te kiss kha zei na an ti bawk a, zan khat ah vawi engemaw zat kiss hman ngei ngei kha zing thawh hlim atanga rilru a awm a ni mai. Chu zei na thuruk chu apply tluk tluk a thalo tih chu ka thurawn dawn hmasak ber ani zawm ta tlat mai. Uai, a va in mil dawn lo ve. Kiss deuh fo loh chuan Zei loh na, Kiss deuh hlek pawhin Zei loh na tho maw ni dawn? Umn engtia hma han lak chi nge ni ang le. Zei hi a lo va han har ngai em, engah nge maw hetiang a ngaihzawng neih a zei tel kher kher a lo ngaih le aw....

A tawk te in
Tichuan le, beidawn tawp ah thiante bawk zawh leh a ngai ta tlat mai. Engtia han chhunzawm tur nge tih chu a rang thei ang bera hriat a ngai tlat. Ka thurawn dawn chhun chu,"I kiss tam lutuk chuan a ning che anga, i kiss tlem lutkuk chuan zeilo a ti ang che," tih ani leh ta. Umn...a tawk te a tih thiam a ngai dawn ta anih chu mawle. Engtin nge ka tih tak ang? A tam lutuk chuan min ning vat ang, a tlem lutuk chuan zeilo min ti em em anga, ka mark a chhe vek ang. A tawk chiah chuan engtin nge ka tih tak ang le? Chu erawh zawng kei maha inzir turin min ti tlat a, in hrilh mai chi pawh ani lo, mahni a tawng chhoh a in siamrem ngai, kan ngaihzawng te a zir a mahni in siamrem ngai a lo nih chu mawle.

Ka zei chho tial tial
Tichuan kan kiss ngun ta bawk a, tihdan pawh ka thiam ta viau mai. A tawk chin pawh ka hre chho ta a. Zan khat ah vawi khat a tawk, chu pawh haw dawn ah han tih zeuh mai kha a tawk  ni ta in ka hria a. Ka zei chho ve ta tial tial mai. Ka bialnu pawh chuan min duh tawlh tawlh ani ber mai.

Zun a uai
Ka zei tawh viau a ka inngaih lai chuan zirlai thar zir tur ka lo la nei reng chu niin. Chu chu ,"Hmeichhia chu kan zun a uai tir tur, min duh em em phawt sela engkim a fel vek mai," tih chu ka zirlai thar chu ani. Tichuan ka zun a ka uai tir dan tur ngaihtuah chuan buai leh a ngai ta. Ka zirlai hmasa lamah thiante zawt reng reng in hun ka hmang a, tun tum chu keimah in ti ve tawh teh ang. Ka theih ang angin ka bei chho ve a, mahse ka zun a uai tir aiin a zun a uai a ngai zawk ta tlat mai. Ka zun a uai tir ka tum na lamah a zun ah ka uai a, ka tal buai chu ani ta der mai. Engtin nge hma han lak zawm tur nge ni ta ang le?
(Peih hunah ka rawn chhunzawm leh ang)

Read more »

I blog a i thu ziak an post chhawng ve tawh em?

I blog a i thu post te, hmun dangah i phalna leh i remtihna la lemlo in an lo post ve tawh em?

May thla tir lam khan ka blog a ka thu post te Google ah ka search vel mai mai chhin a. Chutah chuan ka blog a ka post ang chiah hi blog dangah an post ve ani tih ka va hmu a. Tichuan ka en chiang ta a, Ka blog a ka post hun leh chumi blog a an post hun chu ka enchiang a, kei aiin a post hnuhnung ngei ani tih ka hmu ta a.

A blog neitu hi contact ka tum thin a, mahse ka contact theih tak mai loh avangin tihdan dang ka ngaihtuah ta a. Tichuan complaint thehluh theihna tur ka hmuchhuak ta hlauh mai a. Google lam chu ka contact ta a, an ni chuan ka complaint thehluh chu lo pawm in an lo remove sak ta ani.

Hetiang thil hi nang pawhin i tawng ve thei a. Hma lak vak ngaihna i hrelo anih chuan HETAH hian click la, google lam thu neitu te hnenah report ve rawh le. Thil pakhat hriat reng tur chu, i post a lak chhawn ngei ani tih i chiang ngam tur ani.

Thian tha tak tak te ka blog a ka thu post lo chhuahchhawng duh ten tha takin min rawn dil a, a lawmawm em em a, ui miahlo in ka chhuah chhawn tir mai thin a. Min rawn dil lemlo, an thu lakna source pawh ziaklang leh duh lem silo ho hi an buaithlak em em ani.

Read more »

Mizo tawng upa zir ang

(Hei hi misual.com a ka post tawh ania, helam ah hian kan dah ve leh mai mai ange.)
Tun tum chu Mizo Idioms & Phrases(Tawng upa) hi i zir ho teh ang u. Hetiang lam post hi ka hmu khat riau mai a. A thiamlo ber hian kan post ve ange.
Chhun leh zan hun then hrang hrangte hi a hmasa ber atan zirho phawt ila, post dangah a dang chu kan chhunzawm leh dawn nia.
Ka hriat hi a dik ber e ka tihna pawh ani lem lova, unau thawnthu sawi pawh a dang e an tih thin kha, Kan hriat dan a lo inang lo deuh anih pawhin comment lamah kan sawi ho dawn nia.
1. Khawfing chah: Khawvar hma lawk hian rei vaklo thim zual bik hun a awm a. Hemi a pelh veleh hian khua in ên lam a pan tial tial thin a, chumi lo ên tan hun chu Khawfing chah ani.
2. Thingchang var: Khawfing chah hma lawk hiankhua a lo êng lawk hlek thin a, chumi hun lai chu ani.
3. Varţian: Khawvar tantirh hunlai hi Vartian ani.
4. Leilung lan: Khawvar hnu ah, thil a hmuh chian tan theih hunlai hi ani.
5. Khuantevik: Zing ar khuan hun, khawvar ar khuan hun.
6. Kawl en: Khawvar tan tirh, kawl bul lo en hun lai.
7. Ni tlang san: Ni a chhuah san tawh hnu, Dar 7/8 vel bawr ani ang chu.
8. Nau riltam/Feh reh/Thingphur haw hun: Heng te hi chawfak hun hma, tukthuan ei kham leh chawfak inkar hun lai ani. Dar 10/11 bawr vel ani ang.
9. Chawfak hun : Chhun chaw ei hun lai hi. Dar 12 vel ani mai ang chu.
10. Chawhnu thlang her: Chawhnu thlang her ah hi chuan chawhnu lam, ni in vanlaizawl a pelh tawh hun ani. Dar 1/2 bawr vel ani ang.
11. Behliang mun hun: Zanriah chhum hun aia hma deuh. Behliang hi a hmin har avangin zanriah chhum hma in an mung thin. Dar 2 bawr vel ani ang.
12. Zanriah chhum hun: Zanriah chhum hun hi chu tlai dar 3 bawr vel hi ani awm e.
13. Lo sul haw hun: Ni tlak hma deuh, feh haw hun. Dar 4/5 bawr vel ani ang chu.
14. Unau hmel hai: Ni tlak tawh hnu, khua a la thim tak tak hma si, thil hmuh fiah theihloh hun lai.
15. Leng len hun: Zanriah ei kham, tlangval te nula rim tura an chhuah hun vel hi ani.
16. Thut muan ar khuan: Zan dar 8 bawr vel ani ang. Inleng inkawmhlim hunlai vera ar khuang hi ani.
17. Leng hnawtchhuak ar khuan: Leng haw hun lai. Zan dar 10/11 vel bawr ani ang.
18. Zanlai ar khuan: Mut reh hnu, zanlai dar 12 vela ar khuan thin hun lai hi

Read more »

Khawbung a la ti ta deuh deuh

Tun tum chu Khawbung ala ti ta deuh deuh tih lo chhuah chhan hi kan ziak ve mai mai teh ang.

Khawbung hian lar ve riau na a nei ve a, chu a lar ve riau na chhan chu Sangpuiipa awm vang emaw, Mizo Hlakungpui Mual awm vang emaw, A khaw nawm vang leh chho kal tur thui tak a awm ve loh vang lam a ni lova, 'Khawbung a la ti ta deuh deuh' tih tawng kam vang hi ani.

He tawngkam lar tak hi a khaw neitu te hian an zahpui lova, an iai lova, an hnualsuat lova, an hlimpui em em zawk ani. Mi te hian uar tak leh lar takin hmang se tih hi an duhthusam ani.

He tawngkam lo chhuahna bul chu Lailen khua atangin Tlaikuangah Kairuma a kai dawn hian tuna Mizo Hlakungpui mual awmna bulah hian Hmar Khawbung chi tepeng tlem te an awm a. A tam ber chu Luseiho thlangtla tur huphurhin Manipur lamah an lut tawh a. La chambang tlemte chuan Kairuma upaten kai tuma ram an en an lo hmuh in, an lo huphurh em em a. An lo kai huna insawi dan tur an ngaihtuah lawk a. "Eng hnam nge in nih?" min rawn ti ngei anga, min hnawhbo loh nan kan hnam hming saw loin," Hnam bik kan awm lo, hnam hrang hrang inpawlh kan ni," tiin kan lo chhang dawn nia," an ti a.

Kairuma ho chu an kai ta ngei a, an rin lawk ang ngeia an han zawh chuan,"Hnam bik pawh kan awm lo, i khua leh tui turte kan nih hi," tiin upate chuan an lo chhang a. An zinga pa phutkhat deuh hi an han zawt ve a, ani chuan,"Hmar," tiin a chhang a. An hotute chuan an han melh kawk a. "E, Khawbung," a ti ta roh a. An upate chuan,"Khawbung a la ti ta deuh deuh," tiin an nui zo ta a. Heta tang hian he tawngkauchheh hi a lo chhuak ta ani an ti.

Read more »

Ngaihzawng ka nei ve a - I

Kam keu na
Ania lawm, nula rim pawh kha ka ngamlo rei ania. Thiante nena nula rim tura kan kal pawh a kawng chanve atanga haw leh nal nal thei kha ka nia. Khatia ngaihzawng ka nei tih an han hriat khan ka chhungte chu sawi loh, ka thiante ngei pawhin mak an tia, an nuih te pawh a za viau. Duh leh mak lo ti mai mai rawh se, a nih tur ang kan ni zo vek tawh.

Nuam ve tak ani.

Mi te pawhin ngaihzawng an nei ve thin a. Ka ngaihzawng neih ve hi chu a danglam bik nge a zei bik ni dawn ni, midang ngaihzawng nei ve te aiin nuam ka ti fâl bik hian ka hria a. Thiante ngaihzawng 10 vel neihna ai pawhin ka sawi duh zawk in sawi nuam ka ti zawk tlat.

 

Zei a har

Thil reng reng hi a vawi khat na hi zei a har duh khawp mai. La tih ngailoh tih tak ah an ina len pawhin sawi tur a vang a. Thiante thurawn min pek 'Ngaihzawng te chu pek dak zauh zauh tur' tih leh 'Tleirawl ngaihzawn chu Biri zuk nen a inang, fawh zauh zauh loh chuan a thi duh' tih pawh chu a vawikhat na ah chuan har tak ani. Thiante lah chuan,"I biri tawh em?" min lo ti ve chhen bawk si. Tih dan tur min zirtir tur an awm bawk si lo, ngaihzawng ten zeilo min tih hlau bawk si, thian ten pa lo min tih duh si lo kara len chu nuamlo ve tak ani. Zei tur chuan zah theihloh a ngai tih chu ka laina hnai pakhat hnen atanga thurawn ka dawn a ni. Mahni lo maha a zakzum chi lo nih ve bawk nen,"Engatinge ka nu hian zei sa a min hrin loh le?" tih rum rum chang a tam.

 Zei na thuruk
Zei duh avang leh zei loh hlauh avang chuan huaisenna sawmkhawm a ngai a. Lehkhabu hrang hrang ah zei nalam thu ziak a lan tawh phawt chuan chhiar loh a chhuah a awm meuh lo tan. A takin ka thil chhiar leh hriat te chu ka hmang ngam angem? Hetah pawh hian Zei tur chuan zah theihloh a ngai tih bawk chu a pawimawh leh ta tlat mai. Thian thenkhat te chuan veng mawng nuthlawi in ah Ramhuai Tuibur an han lem deuh zauh a, an zei em em mai tih chu zei dan ngaihven a phe phe ta chuan ka hrechhuak ve leh ta a. Mahse an tih ang hian han ti ve ngawt dawn ila kohhran lamah ka lo inhman ve nasat lai a lo ni bawk si. Sunday School zirtirtu te, thalai lamah pawh zaipawl member leh eng eng emaw ah nihna ka lo nei ve nual si. Ramhuai tuibur hmuam ve chuan ka mualpho thei dawn tlat. Bei a dawng leh ta, engtin nge ni ta ang le?

Hun harsa chu
Zan khat chu Sunday zan inkhawm ban hian ka va leng leh a. Thian ten," I pa lo lutuk, hmeichhia chuan pa deuh an duh. Biri tawh rawh," tiin min lo fuih ve  chhen bawk nen. Hemi zan hi chuan bialnu ten zeilo min ti ang tih hlauh vang leh thiante bulah pa loh nih hlauh vang tal in zanin chu zak chung chungin engkim ka ti ve ngam tur ani. Ka kiss ngamloh chuan min duhlo tulh tulh ang tih chu ka thurawn hmuh chhun ani bawk a pa deuh a chet ve a ngai tawh tlat. Tichuan le, ka thu ta ran mai a. Engtik ah nge ka chet ang, eng tia bul han tan tur nge tih ngaihtuahna ah a lo lut a, ka buai leh ta tlat mai.Hui ha, kei hi ka zei ve thei dawnlo ani ang. Zan a rei tial tial a, zan dar 10 bawr vel a lo rik chuan rilru ah engtin nge ni ang tih ngaihtuah ran in ka thu a. Thlan fim in min bual huh vek lo chauh tawh. Zanin hi chuan ka ti lehlo mai dawn em ni? Mai mai a, kal hma atangin zei ka tum tawh a, ka hlawhtling ngei tur ani tih chuan hnehna a chang a. Tichuan hui pap pap chung chuan thut leh deuh rih a ngai tlat. Sana lah chu a vir chak si, duh aiin hun a kal chak duh phian. Hemi hun chhung hi darkar 3 vel bawr ani a, mahse ka hun tawn ah chuan hun a kalchak ka tih ber tum leh rei ka la tih ber tum ani thung lawi si a.


Ka zei ve ta
Tichuan le, zan dar 11 a lo ri dawn ta mai a. A chhung ten lengrei min ti ang tih hlauhna a lian tan ta. Chhei le, haw a va hun tawh em tih leh eng hunah nge ka kiss ang, engtin nge bul ka tan ang tih ngaihtuahna insual vel avang chuan tawng pawh ka tawng tlem ta khawp mai. Hemi zan kher hi chuan hlawhtlin ka tum ve laklawh tawh si. 'Engatinge zanin kher ka lo tih le, hun dangah hun thawl deuh awm hunah te ti zawk ila,' tih leh 'Ka ti laklawh tawh a, zanin hian ka hlawhtling ngei tur ani,' tih chu rilru ngaihtuahna ah an insual zak zak tawh mai a. Dar 11 pawh a lo hnai tial tial a, thawm riva a tlem tial tial a, kan thawm pawh dim a ngai tan ta hle mai. Umn..., val in ka tum laklawh tawh a, a tul pawhin ka tharum in ka nuai mai ang ti rilru chung chuan ka va kuah a, a inrin loh lai ni a ka hriat ah chuan ka pawm thut a, ka kiss ta hmiah mai a le.... Ka zei ve ta. Kan in haw lo dun bawk a a lo tang bik hauh lo. Mahse kan in kiss kha ka rilru ah pakhat mah in a lut hauh lo thung. Engtin nge in kiss lai in awm tur? Ka meng kur dawn nge ka maimit chhing ang? Ka kiss ve ngawt a a tihdan tur ngaihtuah hmasak a lo ngai anih hi ka ti leh hnuhnawh. Mahse pawi lo, a awm dan ang angin ka awm ve hmiah mai ang.

Ka hawi sang hle
A tuk ah chuan thiante ho nen kan in hmukhawm leh a. Ka kal tur te chu ka hmanhmawh khawp mai. Sawi thuai thuai a chakawm tlat. Ka kal reng reng chu ka zang vah mai a, ka hawi dak deuh vah bawk a, ka nui sang bawk. Min hmu ngailo tu emaw, min lo hmu thang tu te tan pawh enge maw a hriat le tih mai tur khawpin siamtharna ka chang tlat. A hre duh chuan min zawt zel rawh u, Thangchhuah pa ka ni tawh tlat, ka hawi sang hle tur ani.

Zawhna chhan nuam
Thian te ho nen chuan a ngai te bawk in kan chhuahkhawm na thin ah chuan kan chhuak khawm kim ta a. Zan lama kan chet dan vel report hrang hrang a lut a. Tum dang ang bawkin tu emaw tal in," I biri tawh em?" tih min zawh hun tur chu nghakhlel takin ka lo thlir a. A tawp ah chuan kan thian pakhat chuan chu zawhna ngei mai chu min rawn zawt leh ta chat mai le. Nidang ah chuan chhuanlam eng eng emaw siam a in sawifiah viau zel ngai thin kha ania. Tun tum chu chhuanlam siam a ngai tawhlo tlat. A chhanna pawh sei tak a ngai lo, "Dawn lawm ni" tih zawng a tawk mai. A bak chu engmah ka sawi zui dawn lo. Zawh thui vak pawh ka ngai tawh lo, nuih ver ver ani tawh mai.

(Hemi chinah hian duhtawk phawt ang, ni dangah ka rawn chhunzawm ang).

Read more »