Lushai Technology

Mizo ten internet lama hma kan sawn lehzual theih nan, a bik takin website lamah hma kan sawn theih nan hlawkna um lovin Domain leh host lei theihna website kan siam ve a. Man tlawm takin lei theih a ni e. Tin, website siam duh, mahni a design thiamlo te pawh man tlawm zawk in kan design sak thei reng bawk.
Lushai Technology hian free hosting kan buaipui mek a, reilote ah a free a hman theih tur kan rawn peihfel thuai ang. A hnuaia link ah hian lo en ve teh le.
http://www.lushaitechnology.com

Read more »

SOURCES OF WATER

Tui hi khawvel a thil pawimawh ber te zing ami a ni ti ila kan sawisual tam awm love. Tui hian tuipui, lui leh dil te luah in Khawvel hmun li a then a hmun thum aia tam hret hi tui hian a luah a ni. Tlang hrang hrangah vur angin a awm a, tin, lei chhungril ah a awm bakah kan atmosphere (Lei tuamtu boruak) ah te tui hu angin a awm nual bawk a ni. 

Tui kan hmuhna hrang hrang te hi hlawm lian tak pali ah then ta ila : 

1. Tuipui : Khawvel pawn 71% vel hi tuipui kan tih hian a huam a. Kan tui hmuhna za a sawmkua leh pasarih (97%) hi tuipui atanga kan hmuh a ni. Mihring leh thlai tena tui kan mamawh hi 1% vel a ni a, tui hi kan hman thiam a, kan enkawl uluk chuan kan duh anga tam hman tur kan nei reng thei dawn a ni. 

2. Ruah tui : Ruah tui kan tih te hi boruak bawlhhlawh lohna ah chuan kan tui hmuhna hnar pawimawh tak a ni. Lei lama tui te tuihu ah chang in van lamah an chho a, chu chu a rawn sur thle leh a, ram hnuaihnungah chuan kan buh leh thlai te chawmna pawimawh tak pakhat a ni. Amaherawhchu boruak bawlhhlawh avangin engemaw zat hi chu in tlakloh ah a chang thin a ni. 

3. Tui tling: Tui tling kan tih hian lui leh dil vel atanga kan hmuh ho hi a huam a. Kan tui lakna pawimawh ber te zing ami a ni. Amaherawhchu kan bawlhhlawh paih avang te, kan thli hrang hrang, ran thi kan paih mai mai leh kan bawlhhlawh hrang hrang avangin a tam zawk hi chu ei leh in tlakloh ah kan chhuah tawh a ni. 

4. Tuichhunchhuah : Tui chhunchhuah kan tih hian lei hnuai atanga kan laihchhuah/pump chhuah ho a huam a. Lei pawnlang a tui te hi lei hnuaiah lut in tha taka in filter in a lo awmkhawm thin a, chu chu kan zuk pump chhuah in ei leh in atan kan lo hmang thei thin a ni.

Read more »

Check your T.V. Remote control easily

Tunlai khawvel ah remote control hi kan hmang nasa a, kan thil tihna hrang hrangah remote control hman kan uar in kan nunphung pawh a ti awlsam khawp mai. T.V. mai nilo, electronics thil dang dangah pawh remote control hi kan hmang nasa em em tawh a ni.

Hetiang taka pawimawh anih avang in a chhiat in a buaithlak thin hle a. Tin, remote hi in millo leh in man theilo a awm theih avangin lei sual palh a awl thin hle. Engemaw chang chuan a chhe sa te pawh lei chang a awm thin. Chuvangin awlsam taka remote control tha leh tha lo hriat theihna hi a pawimawh hle a ni.
A hmasa ber ah chuan i remote control battery kha check phawt ang che. A check na i neilo anih pawhin a thar lei la, chu chu i remote ah khan i thun dawn nia. Battery thar i thun hnu pawha a la thalo anih chuan hetiang hian i test dawn nia.
A hmasa ber ah chuan tunlai ah mobile phone kan nei deuh vek tawh a, i phone camera on la. Camera ah chuan remote atanga signal pekchhuahna hmawr chu i tin zawn dawn nia. I camera ah chuan en la, remote chu hmet rawh le. A hnuaia a lem ang hian a awm anih chuan i remote a chhia a, a chhung lamah siam a ngai tih hriat tur. A siam thiam hnena kalpui mai tur a ni.

Amaherawhchu a hnuai ami anga a lo eng anih chuan i remote chu a tha tihna a ni a. A thar lei kher a ngai lemlo.

Hetianga check nachang kan hriatloh avangin mi tam takin tul lo takin remote thar kan lei phah thin a, sum kan seng thlawn mai mai thin a ni.

Read more »

How to make windows 7 genuine

Windows 7 genuine lo hman hi a buaithlak thin hle a, tin a key neih mai loh te pawh a awm thin a. Chuvang chuan awlsam deuh a genuine a dah theih dan hriat hi thil pawimawh tak a ni ve a. Tunlai ah software tam tak a chhuak tawh a, amaherawhchu heng ho hi antivirus ten virus awm anga a hmuh thin avangin a buaithlak chang a awm thin a. Chuvang chuan software dang hman ngailoin awlsam taka genuine a dah dan kan sawi dawn a ni.

Tuna kan software hman tur hi DOS a ni a. Computer zawng zawng, windows operating software hmang ho chuan a hranpa a download ngailo in an nei vek a ni.

A hmasa ber ah chuan DOS kan hawng phawt ang. Chumi tur chuan Start button ah click la, search programs and files tih ah khan cmd tih type la, chunglamah khan a rawn lang ang. Chu chu i right click anga, run as administrator tih ah khan i click anga, DOS chu a rawn inhawng dawn a ni.

Khitiang a lan hnu khian a command kan type thei ta. SLMGR -REARM tih i type anga, enter i hmet dawn nia. A code khi small letter leh capital hman theih ve ve a ni a, amaherawh chu small i hman chuan small vek, capital i hman chuan capital vekin i type dawn nia.

ENTER i hmeh zawh ah a hnuaia a lem ang hi a lo lang anga, OK lo click mai tur a ni.

Ok i click zawh chuan i computer restart la, i windows 7 hmanlai chu genuine a lo ni tawh ang.

Read more »

Halleluiah Chorus & Amen

Khawbung Kohhran Zaipawl in kum 2015 Tuipuiral Presbytery inkhawmpui, Khawbung Kohhran-a neih ah khan Halleluiah Chorus leh Amen hla inzawm hi kan sa ve a. A ropui dangdai ve khawp mai.

Halleluiah Chorus hi hmun hrang hrangah kan sa thei deuh fur hlawmin ka ring a. Amen hla tak erawh hi chu a hla thu a tlem viau a, AMEN tih zawng anih laiin a har em em mai a. Keini ang thingtlang khua atanga sak atan chuan ropui ve tak a ni.

Read more »

English-Mizo Dictionary ka siam ve a

Computer a hman tur English-Mizo Dictionary ka siam ve e ka tia. Hun neihloh nen a hautak ve viau mai. A file a lian lemlo a, engemaw chang a han en mai atan a tha ve riau a. I duh ve anih chuan a hnuaia link atang hian i download dawn nia.
Ka computer a chhiat avangin ka chhunzawm thei lova, a part te chah in tunah chuan ka chhunzawm leh thei dawn ta e.
Dictionary Download

Read more »

WAPKA site edit dan

Wapka a site in register dan kan sawi tawh a. Tun tum chu site edit dan a bul te atangin in sawi leh dawn teh ang.

A hmasa ber ah chuan www.wapka.com ah lut leh phawt mai la. Login na tur pahnih a lo awm anga, a chung zawk kha hman tur a ni. Passport(email) tih ah khan i in registerna email address i type anga, password ah i password kha i type leh mai ang. Automatic login kha i enable chuan i luh leh hunah email leh password type kher ngailo in a luh theih mai thin a. Mahse computer in hman tawm chi ah chuan a fuh kherlo maithei.

Login button i click zawh ah phek thar a lo in hawng anga. Site List tih hnuai ah khan i site siam thar kha a lo lang anga. Chu chu i select anga, page thar lo in hawng ah chuan hetiang ang hian a lo lang ang.

User mode hi User te anga site lan dan en na a ni a, Admin mode hi Admin tana site Edit  na tura kan luhna tur ber chu a ni leh a. Stats tih atang hian kan site statistics en theih a ni a. Nitin a kan visitor neih zat te, kar khat chhunga kan neih zat te leh thildang dang en theih a ni a. 

Settings hi site settings siamna tur a ni bawk a. Advertisement ah hian kan site a pawisa hlawh a kan advertisement dah theihna tur siamna a ni a. Tin, Support tih ah hian WAPKA forum leh Private Message te en theih a ni bawk. 

Tools atang hian thil tam tak a tih theih a, Free space transfer te leh eng eng emaw a tih theih a. Home page tih hi a hma chiah a page lo lang a let lehna kha a ni.

Tichuan site Edit tur chuan Admin mode chu kan select a ngai ta a. Kan select hnu chuan kan site ah a lut anga, chumi ah chuan kan site ka edit na tur hmanraw hrang hrang kan select kual tawh dawn a ni.
Admin mode ah chuan kan site homepage kha a lo lang anga, mahse page edit na tur ho kha hemi ah hian a awm vek thung tawh dawn a ni. Engmah i la dah loh avangin a var blank pawp in a lo lang rih anga. Page dinglam sir hnuailam ah khan Edit Site tih a lo awm anga. Kha kha click tur a ni. Hetiang hian a lo lang anga.

 

Heng a chunga mi te hi a hmanna hrang hrang post thar ah kan sawi zawm leh dawn nia.

Read more »

Wapka a in register dan

Wapka chungchang post kan tichhuak tawh a. Tun tum chu a in register dan lampang hi sawi ve leh dawn ta ila a tha awm e.

Wapka website www.wapka.com ah i lut phawt anga, Wapka passport tih ah khan hnuai lamah Signup tih kha i click anga. Veilam sir a thlalak ang hian a lo lang ang.

Passport(email) tih ah hian i email address i type anga. Password ah i password hman duh kha i type leh anga, Confirm Password ah hian a chung chiah a i password type kha i type nawn leh ang. Site name ah hian i site hming tur hi box hmasa zawk ah hian i type anga. A piah ah hian .wapka.mobi tih te, .wapka.me tih te, .wap-ka.com tih te select tur a awm a. I duh ber kha i select mai dawn nia.

A hnuai a accept tur awm ho kha i select vek anga, Chumi zawh chuan Sign up tih button ah click tawh mai tur a ni.

I tih zawh ah i email ah activate na tur link a thawn anga, i email i hawn hnu ah link ah chuan i va click anga, tichuan i site thar tur chu a hman theih nghal mai dawn a ni.

Site thar a nih avangin a blank vekin a lang dawn a, i thil dah tur kha nangman uluk taka html code nen i siam ve a ngai dawn ta a ni.

Kan sawi tawh angin Wapka hian wml/xhtml bakah Javascript te a support a. HTML tlem azawng thiam tan chuan huphurhawm pakhat mah a awm lemlo. Tin, amah hian code hman tur eng eng emaw a nei sa ve a, chung chu kan account ah hian en mai theih in example nen a awm sa thlap bawk.

Read more »

Automatic Water Level Indicator/Controller

Tun tum chu kan tuizem a kan tui pump luh te, tuizem chhung bih kher ngai lova inchhung atanga a tui awmna chin awlsam taka tarlang mai thei tur khawl siam dan sawi ve thung ila. Electronics lama thiamna leh engemaw chen hmelhriat na nei lemlo tan chuan hriatthiam pawh a har deuh mai thei. 

A hnuai ami hi a circuit diagram chu a ni a, hemi hmang hian i tuizem a i tui pump kha ngaihven ngai miahlo in awlsam takin i pump anga. A khah hunah a mah in a lo in off mai dawn a ni.

  

A chung a a lem hi ngun takin en la, Water tanks chhunga Rods(Sr 1-6) te hi tui a in chiah reng tur an nih avangin alluminium hman tur a ni. Tin, switch 1 hmang khian tui khat tur chin pawh i duh ang zat ah i dah sa vek thei a. Entirnan, SR5 thleng chin dahkhah i duh chuan Switch 1(S1) ah hian pin no 5 zawn ah i herh mai ang. Chutiang zel chuan a dang pawh hi tih vek theih a ni.

Tui chim chin i hriat theih nan LED 1 - 6 hi a eng zel dawn a. I tuizem a khah chuan LED 6 hi a eng mai ang. Tuizem chhung en kher ngai lovin LED hmang hian tui awm chin i hre thei zel dawn a ni.

Read more »

PHP-FUSION

Tun tum chu PHP-Fusion chungchang hi post ve tlat teh ang. PHP-Fusion hi kan la hmelhriat lar lutuk lo mai thei a. A hming pawh hi kan vawikhat hriatna a ni maithei.

PHP-Fusion chu website siamna software a ni e ti mai ila a chiang thei mai awm a. PHP-Fusion hi PHP leh MySQL tangkawp hmanga website siamna a ni a. Kan hriat lar em em Wordpress te ang hi a nihna chu a ni mai. Website siam tur te tan chuan download hnu ah server ah upload a, mahni duh dan a chei mai theih a ni.

PHP Fusion hian News, Article, Private Message, Downloads, Weblinks leh Photo Gallery te a chhawm vek a. A vai hian a rual a hman vek theih a ni. Tin, duh bik nei tan mahni duhloh zawng kha disable mai theih vek a nih avangin a awlsam hle bawk.

Heng a chhawm sa bakah hian addons tam tak download a hman mai theih a awm a. Tin, theme te pawh mahni duh ang download a hman mai tur a awm teuh bawk. Tin, a code hi a harsa em em lemlo a, chuvang chuan PHP thiamna tlem azawng neih chuan awlsam taka mahni duh dan anga siam kual theih vek a ni bawk. Theme te pawh HTML leh CSS hrethiam tan chuan awlsam taka chei danglam theih vek a ni. Tin, a hrethiam lemlo tan pawh awlsam taka download mai tur a awm teuh a, buaina tur a awm lem love.

PHP Fusion hi a that ve riau na chu hriatthiamloh leh buaina neih hun a zawhna zawh mai na tur an nei tha em em hi a ni. Ram tam tak ah mahni tawng hmanga harsatna zawhna hmun an nei nual tawh a. India ram tan pawh www.php-fusion.in hi hetiang atana duan a ni a. Tin, Mizo tawng ngei a a locale(language) te pawh hman theih turin download tur dah a ni ve tawh bawk.

PHP Fusion hi tunah hian Version 8 buaipui mek a ni in peihfel a la nilo deuh a. Peihfel thuai tura beisei an ni bawk. Ram hrang hrang atanga mithiam tam tak ten an enkawl a nih avang hian a security bakah a nihphung pawh tha ve hle turah ngai phawt ila. Tin, a size a len loh avang hian a zangkhai in a page load a rang hle bawk.

Read more »

WAPKA

Wapka han tih tawp mai chu a awmzia la hrelo tan chuan a bo theih viau awm e. Tlemlai deuh atang khan current kan hmu chhe em em mai a. Blog lama thu han ziah ve duh pawhin mobile atang chuan a lo tih ve theih der loh mai a. Tichuan blog siamna tur, mobile hmang pawh a awlsam taka siam theih mai na tur ka zawng kual ta a. Chuta ka hmuh chhuah tak chu WAPKA hi a ni. 

Wapka chu mobile user te tan deuh bik a siam a ni a. Mahse site pangai anga cheibawl duh pawhin a theih vek tho. Mobile hmangin awlsam taka a code pawh edit mai theih a ni a. A code ah hian html, xhtml, wml leh javascript te a support vek bawk. Awlsam taka mahni duhdan a edit mai theih vek a ni.

A awlsam leh na chu download tur file a dah teuh theih hi a ni a. Nangman i file duh ang te midang lo download theih mai tura i upload thei vek hi a awlsamna chu a ni. Tin, midang pawhin an lo upload ve theih turin i siam thei bawk.

Thlalak, text leh file te a dah kawp theih vek avang hian a tangkai hle a. Tin, blogger a tih theih ho hi chu a tih ve theih deuh vek bawk avangin a awlsam in a tha hle. I ti ve duh a nih chuan WAPKA.MOBI ah hian in a free in in register ve mai rawh. Tin, harsatna i neih chuan Zo-Mobitech ah hian zawh theih reng a ni bawk e.

Read more »

In ek mawi siak thu

Hmanlai hian lal ropui tak mai Akbar-a hi a awm a. A lalram a zau in thil a ti thei hle mai a. Akbar-a chuan khawnbawl upa fing tak mai Birbal-a a nei a. A fing in rorel a thiam a, Akbar-a pawhin a hmingthan pui in a chhuang em em thin a.

Nikhat chu, Akbar-a chuan Birbal-a aia fing nih a duh ta a. Birbal-a ngaihtuah chhuah theih ni miahlo tura a rin 'IN EK MAWI SIAK' ah a cho ta tlat mai a. Birbal-a chuan chu cho na chu a pawm ta a. A tuk zing a in ek mawi siak tur chuan an in then ta a. Chu thu chuan Akbar-a ram zau tak pawh chu a luahkhat ta nghal a.

Chumi tlai chuan lal Akbar-a chuan a ek mawi nan chawhmeh chi hrang hrang, Artui te, sa chi hrang hrang te, leh chawhmeh tui tak tak mai a ei teuh mai a. A chawhmeh tui tak avang chuan a ek pawh chu a mawi hle in a ring a. Tichuan,"Naktuk zing ah chuan mi zawng zawng in Birbal-a aia ka fin zawk thu hi an hria ang a, min ngaisang lehzual sauh ang," ti rilru chung chuan tui takin a mu ta a. Birbal-a erawh chuan ngun taka a ngaihtuah hnu in ei tur chikhat chauh a ei ta a.

A tuk zing ah chuan mi tam tak chu Lal leh Birbal-a in ek mawi siak en tur chuan lal in tual ah chuan an lo kalkhawm ta a. Akbar-a chu intithei tak chuan a e hmasa ta a. A ek chu mawi hle tura a ngaih laiin a thil ei pawlh hnem lutuk avang chuan rawng chi hrang nalh lo zet hian a e tial ta ruai mai a. Birbala chu a e ve ta a. Mawi takin a e eng(yellow) ta pial mai a. Tichuan Birbal-a ek zawk chu mawi zawk a thlan a ni ta a.

Akbawr-a chuan,"I finna hi tu ma phak rual a ni love, i ek mawi nan hian eng dawi thil nge i hman?" tiin Birbal-a chu a zawt a. Birbal-a chuan eng dang a chhang lo chuan,"Aw lalber, ka ek mawina thuruk chu 'MAI' hi a ni e," a ti ta a.

Mai hi ek mawi nan mai nilo, mit tan te hian a tha em em mai a. Chuvang chuan lo ei nasa lehzual ang che. :-D

Read more »

Vawiin ka pianchampha

Ekhai, kan ti nek nek a, ka birthday a lo thleng der  mai. Ka birthday ka lo theihnghilh hmin thak tawh a, fb lama ka thian fel tak pakhat in a hun thlen hma in min rawn hrilh hre hlauh mai a, ka lawm khawp mai. Tichuan blog update na tur hrelo a ka hawi hil reng lai chuan piancham post ka neih phah ta anih hi.

Kan naupan lai kha chuan ka nu leh pa te hian ka birthday min lawmsak thin a. Ka birthday apiang hian vawk an talh ziah thin. Kum 5 ka tlin thleng khan vawk min talh sak a. Kan thiante bakah kan chhungte leh thenawm hnai ho kan sawm a, chaw kan ei khawm mup mup zel thin.

Birthday ah khan thla kan la ngei ngei bawk thin a. Kan thlalak ah hian single a kan lanna tur ah pawh hian kan thianpa Lalzaia hi khawi emaw lai ber ah hian a lo lang ve hman ziah thin.

Kum 2? lai mai ka lo ni ve ta reng mai. Pathian kaihhruaina ka dawng a, khawtlang ah pawl hrang hrang ah chanvo pawimawh tak tak ka chelh ve ta nual mai. Kan khua ah phei chuan keimah ang rual zingah ka chanvo chelh ang chelh ve hi an awm kher lovang. Ka fel bik vang leh ka tlin bik vang ni miah lovin, Pathian min hruaina vang liau liau a i tih ka hria a, ka lawm em em a ni.

Amaherawhchu naupang te ni si, chanvo pawimawh tak tak chelh ve kan nih avang te, tin ka hmel hi a lo lang naupang em em lemlo bawk nen, upa ta viau anga min ngai an awm thin a. Min hrechianglo phei chuan keimah ang rual te pawh hian min PU lauh lauh thin a. A nuamlo ve duh khawp mai.

Engpawh nise hetiang kum thleng a damna leh hriselna min petu Pathian chu fak in awm sela. Pathian venna a zar ah Damdawiin ah damlohna avangin zan khat chiah ka la riak ve a. Jail ka la tang lova, tun dinhmun ah ka hriselna a la tha hle bawk. Heng te avang hian ka lawm em em a ni.

Tin, thian tha tak tak, ka birthday min lawmpui tu te bakah, ka blog min lo tlawh sak thin tu te zawng zawng chungah ka birthday ni hian lawmthu ka sawi mawlh mawlh bawk a ni e.

Eng pawh chu nise, vawiin ka birthday ni hian birthday lawm nan ka meihawl rawh ka thur dawn tih ka sawi ve mai mai duh a. Zan lamah kan Branch YMA chanchinbu enkawltu, ka thawhpui te nen a lawmna programme siam kan tum bawk. Tin, Sangpuii nu nen pawh a special te pawhin kan lawm ve mahna...:D

HAPPY BIRTHDAY

Read more »

Thil dum ka um

Zan chu thlasik boruak avang chuan a vawt ruih tawh a. Kawlphetha lam kan neihloh avang chuan a reh hle mai a. Ka phone chu ka sik neuh neuh a. Ka chhungte chu an mut vek tawh avang chuan a reh lehzual a, a chang chuan awmpuitu nei tlat te hian ka in hre thin a. Mahse kan enchian chuan keimah chauh in ka awm tih ka hrechhuak leh thin.

Kan in ep lam ruam ah chuan sihal chu an 'U' leh ruah ruah thin a, Chingpirinu hram pawh  chiang takin a hriat theih a. A khat tawkin khawlai ah chuan ui bauh ri hriat tur a awm zauh zauh bawk a. Infiam ve niawm taka rawn in um kawi zawr zawr chang te pawh an nei thin a. Mahse a reh em avang chuan chung thawm te chu khua tihar lo tu an nih ve tlat avang chuan ka beng ah chuan bengchheng thawm in a ri lova, ka khawhar min hnemtu ah ka ngai ve mai a.

Thli lah chu na vaklo hian a thaw heuh heuh a, thla lah chu a eng tha in vanlaizawl ah chuan diptu nei miahlo hian a engno chek a. Mahse thla eng pawh chu rilru ah a lang lem lova, ka facebook khawih lai mek chuan ka lung a len zawk tlat pek a. Chuvang chuan thla pawh chu lo eng raw sek sek, lung a leng tlat lo.

Chutia chu zan reh tak maia ka phone hmanga ka FB melh melh lai chuan ka phone battery chuan a tlinlo ta a, WARNING rawn pe in a ri ta tlung tlung mai a. Chumi lai bawk chuan thli thaw pawh chu thawklehkhat ah a reh duk a, van a chhum lengvak in a hliah vang nimaw, thla eng pawh chu a mit sulh mai a. Chutih lai tak chuan pawn a kan choka ah chuan thawm ring tak mai a lo chhuak a, a rik hian a ri rum rum mai a.

Chu thawm lo chhuak chuan a tir ah chuan min tih phut em avang chuan ka chesawn mai lova. Zawi muang a tho in kawngka chu ka hawng dek dek a, boruak chu a hma aiin a vawt zual ta sauh bawk hian ka hria a. Ka chhungril ah chuan ka mur er er a, ka khur ru bauh bauh bawk a. Kawlphetha eng a awmloh avang chuan thui tak ka hmu theilo a. Ka phone ka hmet eng leh chu battery low avangin a thi hmak bawk si a.

Chutia ka en lai tak chuan thil dum hi chak takin a rawn chhuak phei phut mai a. Ka phu zawk a, enge a nih a, hlauh tur nge hlauh loh tur tih pawh ngaihtuah chiang hmanlo chuan chak takin ka tlan chhuak ve tawp a, ka um zui nghal a. Kan huan sir kawng kawi a a tlan liam puat chu ka hmu hman vuai a.Chutah chiah chuan a ni THLAHRANG a nilo tih ka hriat na chu.

Khami zan khan choka ah sa ka rep a, ka sarep chu ka lo seng theihnghilh pek a. Zawhte dum hnar fing tak khan lo hria in a rawn pan chat mai a lo ni a. Ka sa rep chu a la hman chiahlo na in ka phut nasat em avang chuan thin a rim ve lek lek mai.

Read more »

Website zirchiang leh ang aw

Website design chungchang te kan sawi chho mek bawk a, tun tum chu kan hriat hmasak tura ka duh website chungchang hi tlem i en ho leh lawk ang u. Ka POST siam hmasak ah khan tlem chu ka ziak tawh a, khami chhunzawmna ang kha ni ta mai se a tha ange.

Website hi khawvel pum huap phei chuan a tam tawh hle a, Mizoram ah pawh engemw zat chu kan nei tawh a. Hetih rual hian engtiang chiah a kan website hi awm nge a nih? Engtin nge a lo lan theih? tih leh a chanchin hrim hrim pawh hi chiang taka hria hi a tlem zawk an ni ngei ang. Tunlai chho ah Facebook a lar em em a, Mizo thalai tam takin kan hmang chho mek a, kan la pung dawn chauh ni te pawhin a lang. A hman chu kan hmang thiam mai a, Thu post, thlalak post tih vel te chu kan hre thiam vek hlawm ang. Mahse khan kan thu leh thlalak post te kha engtianga lo lang nghal mai thei nge a nih a, engtiang chiah in nge a kalkual? A chhungril in singsak dan ti mai ila, khami lang nghal thei tura amah a a lo insiam mai dan erawh chu a hrethiamlo hi a tam zawk kan nih ngei a rinawm.

Facebook hi PHP hmanga siam a ni a. Chumi awmzia chu HTML ang chi, a aia changkang hmangin Facebook code hi ziah a ni ti ila kan hrethiam mai ang. PHP hi a lar in hman a nuam a, website kan hriatlar zawng zawng deuhthaw hian an hmang vek. Tunlai ah phei chuan a lar ber ti ila kan daw lovin ka ring. Java Script leh thildang hmang pawh awm mahse a tam ber hi chuan PHP leh MySQL tangkawp hmang website hi kan hmang nasa ber a ni.

Khaile, a design na hi chu a eng a pawh lo hmang ta se, engtin nge kan post te hi a lo in dahthat a, engtiang chiah in nge kan website a lang tur hian a lo insiam tih lam hi ka sawi tum tak zawk chu a ni a. PHP emaw Javascript emaw, code dang pawh hmang se a nihphung hi chu a inang vek a ni mai ang chu.

Khaile, website changkang, Dynamic website kan tih ho(Mizo tawng in engtin nge kan dah ang?, amah leh amah automatic a in siam thei te ti ta mai ila, a dik chiahloh leh comment lamah te rawn sawi chiang mai ula) engtiang chiah a siam nge a lo nih tih chu i zir ho dawn ang hmiang.

Dynamic website siam tur hian thil pawimawh tak pahnih mamawh a awm a. Chuchu website design na, code ziahna leh MySQL Database a ni. Database ah khan kan thil enter zawng zawng kha a lut vek a, a lo in dahtha a. Chuchu kan code ziah hmang khan website a kan duh na lai lai a lang thei tur khan kan ko chhuak leh ta thin a. Computer angah lo tehkhin ta ila, Database chu Hard disk ang hi lo ni ta se, a code ziak kha windows lo ni ta se, Monitor a kan hard disk a kan thil dah te tilang turin kha kan Windows kha a pawimawh ta a. Chutiang chiah chuan Database leh kan code ziak chu a pawimawh ta a ni.

Database ah chuan kan thil dah duh azir in table chi hrang hrang kan siam leh a, chuta kan thil khung te chu hming leh nihna mumal tak pek vek an ni a. Chung an hming leh an nihna hmang chuan kan website a nalh taka lang thei turin kan code ziah hmang chuan kan ko chhuak ta a ni ti mai ila hriatthiam a awlsam in ka ring.

Entirnan, Mizoram hmun hrang hrang a Liana tih hmingpu te hi khawiah emaw ko khawm ta ila, Liana te kha chumi khami hmun ah chuan kal khawm tur ti ta ila. Liana tih hming pu ho chu an lo kal khawm vek thei ang khan, i database chhunga Liana tih hming awm zawng zawng pawh kha Liana tih kohna code hmang khan hmun khat ah lang vek turin kan ko chhuak vek thei ta a ni.

Chutiang chiah chuan entirnan Facebook ah i status i lo update ta a. Kha i thu type kha database ah lut in i wall ah leh i thiante lo hmuh theih turin a code an ziahsa hmang khan a lo lang ta mai thin a. Chutiang chiah chuan blogger ah te pawh i blog i update khan, i thu ziak te chu database ah khunglut in i blog a lang tura an code lo ziahsa hmang khan database ami chu a lo in tarlang ta thin a ni.

Database a i thu dahluh te hi code hmang tho khan website ah a dahluhna tur an siam ta a, a hming awmze nei vek phuah sa hmang khan dik takin a awmna turah khan a zuk in dahlut ta mai thin a ni. Database a i dah te hi i duh hunah i delete thei a, i siamtha thei bawk a. Chumi tur atana pawimawh bawk chu khami tih theihna tur code bawk kha a ni. Dynamic website hi PHP hmanga siam hi a lar ber a, an hmang nasa ber bawk. HTML hlang ringawt hi chuan a siam theih loh a. Tin, mawi tak leh changkang taka siam tur chuan pakhat ringawt a tawkloh chang a awm a, code chidang nen a chawhpawhlh fo a ngai thin.

A hriat chu ka hrefiah viau a, in hratthiam zawng in ka sawi nge sawilo phei chu ka hre lova, in hrethiam turah ka ngai ve ngawt a. Kan mithiam te chuan hei aia chiang zawk hian an ziak thiam ngei ang.

Read more »

Text dahlut ang aw (HTML)

Post hmasa lam chhiar lo tan heng te hi chhiar hmasak phawt nise:

1. HTML zir ang

2 HTML zir ang (chhunzawmna)

Post hmasa lamah title thleng dah dan kan sawi tawh a, khami chin ah khan duhtawk phawt ila. Tun tum chu HTML hmanga kan site siam chhung ah kan thu ziah tur te dahluh dan sawi leh dawn ang aw.

Kan hriat hmasak tur chu HTML hmanga kan website siam ah hian, a page a lang tura kan duh ho hi BODY chhungah kan khung tur a ni. Text emaw, link emaw, image emaw, video te pawh BODY chhungah kan khung vek tur a ni. BODY chhunga khung tur chuan BODY hi kan siam belh a ngai ta a, a code ah hetiang hian kan ziak ang.

<HTML>
<HEAD>
<TITLE>TEST</TITLE>
</HEAD>

<BODY>

</BODY>
</HTML>

BODY hi HEAD chhunga khung tur a ni lova, a hran a awm tur a nih avangin HEAD i closed hnu ah BODY i siam chauh ang. Hetiang zawng hian HTML hmanga kan website siam awmdan phung hi ngaihtuah ta ila a chiang thei mai in ka ring. Kan website siam tur chu mihring angah ngaihruat ta ila. Mihring chuan Lu, Taksa leh ke kan nei a. Hetiang chiah tho hi website awmdan phung a ni thin. Lu, taksa leh ke a nei thin. I lu kha i taksa ah vuah ta la a diklo ang bawkin, HEAD section hi BODY section chhungah khung la a diklo bawk ang.

Chutiang chiah chuan i taksa kha i lu ah vuah dawn ta la a dik dawnlo ang chiah khan, BODY hi HEAD chhunga i dah chuan a fuh dawnlo a. Chuvang chuan a lu i siam phawt anga, a taksa i siam leh ang. HEAD section i khar fel hnu ah chauh BODY section i hawng dawn tihna a nih chu.

Tichuan, kan body chhung ah chuan text dahlut dawn ta ila, a hnuai ami ang hian <BODY> leh </BODY> inkar ah hian kan thu dah duh, website a lang tura kan duh chu type phawt ang le. HELLO, HTML HMAN KA ZIR MEK A NI tih type ang aw.

<HTML>
<HEAD>
<TITLE>TEST</TITLE>
</HEAD>
<BODY>
HELLO, HTML HMAN KA ZIR MEK A NI
</BODY>
</HTML>

Hemi i type zawh chuan save la, test.html chu hawng chhin teh le. HELLO tih lo lang i hmu tawh ngei ang.

Read more »

Meihawl rawh ang u

Tun tum chu thlasik rim nam lam post ve thung teh ang. Thlasik laia kan hman lar em em mai Meihawl rawh dan chungchang hi i zir ho teh ang aw. Rawh ve duh te tan tanpuitu, rawh ve duh lemlo tan pawh Engtiang chiah in nge meihawl hi rawh a nih thin tih kan hriat theih nan aw. Tin, meihawl rawh dan hi chi hrang hrang a awm ve a. Tuna ka sawi tur hi chu kan tleirawl chhuah hlima thianho a kan rawh thin dan a ni a. Khang hunlai khan meihawl tui thlawr kha kan ching hle a, litter 5 kha Rs.50 te in kan hralh ve thin.

Khaile, meihawl rawh tur chuan heng bungrua te hi i mamawh:

1. Chem hriam tak

2. Bawngtuthlawh leh suahdur

3. Buara/Sai ip

4. A halna tur

A pawimawh hmasa ber chu thing a ni. A tlangpui thu in thing tuah atana kan hman theih chi ho hi chu a rawh theih vek a. Thil erawh hi chu a hming ang chiah hi a ni mai a, a thil vek thin avangin a hlawk lo. Then, fah, khiang, sunhlu, thingsia te hi kan rawh tlangpui thin. Bag 10 vel daih tur khawp hi a ram a zir in ni khat vel thing kan kit tlangpui thin. I thing kih sa chu hlam chen vel lek in tan tawi leh la, meihawl khur a rem a awlsam phah in rem tam a awl bik thin.

Thing i kih zawh chuan i meihawl khur tur chu lai phawt la. Hmun zawl lutuk aiin tlem a hmun awih deuh thlan a tha. I thing kih tam dan azir in  a khur tur hi i ti lian in i ti te mai dawn nia. A khur chhuat hi tlem a slope deuh a tih tur a ni a, a zawl lutuk hi a kang tha duhlo thin. Tin, a khur hi a lu lam a arh anga, a mawng lam a zuih tur a ni a. A mawng zuih hi feet khat vel a zau a nih chuan a tawk viau, mei chhem kai na tur a nih avangin a zim poh leh mei a kai rual dawn a ni mai. Tin, a lu lamah hian a meikhu chhuahna tur siam tur a ni a. A sir lam ah kaw 2 kan siam tlangpui thin. A khur len dan a zir in kan siam zau in kan siam zim mai thin. Thenkhat chuan a lai takah kaw 1 chauh te pawh an siam thin.

 
A khur i laih zawh tawh chuan i thing kih sa ho chu khur bul ah i pu khawm anga. Hei hi meihawl khur chhunga rem tawh tur a nih dawn avangin thing lian leh a te deuh dah hran a tha. A chhan chu thing te hi rem hmasak, a mawng lama dah hian a kan kai awlsam bik vang a ni. Nakin a thlan chawp leh ai chuan a put khawm huna dah hran nghal mai hi a awlsam thin. Thing i thiar khawm zawh tawh chuan a khur ah chuan felfai tak, indek thap a rem tur a ni a. A in dek lo lai leh awng deuh lai a awm chuan a kan that theihloh thin avangin tlema thing in si lo a awm chuan thing tuai in i hnawh phui vek dawn nia. Tin, thing te lam hi a kan kai hma avangin a mawng lamah leh a hmur, mei chhem tanna tur lamah i rem dawn nia. Thing te lam chu a chhuat phah ah i hmang phawt anga, i rem thlap hnu ah a lian lam chu a chung lamah i rem chho zel dawn nia.

Uluk taka thing i rem zawh chuan a thing hal kai i hmabak ta a. A mawng lam atanga hal tur a ni a, a fawh kai atan thing ro tha tam tak i chhep anga, i hal dawn nia.

Hemi hma hian thenkhat chuan a khur hi an chhin fel thin a. Hal hnu a chhin pawh a theih tho. I chhin dawn chuan thing hnah hring i lakhawm teuh anga, chu chuan i thing rem chu phui takin i chhin phawt dawn nia.

Chumi chung ah chuan i lei laihna vung kha meikhu chhuak thei miahlo tur khawpa chhah in i vur dawn nia. Chhilh phui vek tur a ni lova, a mei khuchhuah na kha chhin phui tel loh tur a ni.

I thing hal chuan thing hring chu a kan kai a, a ling a sen huam hnu ah chuan a meikhuchhuah i siam ah khan meikhu a lo chhuak vat vat tawh ang. A in ur kai thei ngei a i hriat hnu ah a hmalam i mei chhemna chu i chhin dawn nia. A hnuai a thlalak ami ang hian thing tuai kham chungah hnahthel i phah anga, chumi chung ah chuan phui takin lei vung i dah leh ang.

Hemi i tih zawh tawh chuan a lo kang pawp emaw, lei chhilh belh tur in emaw nikhat ah vawi khat vel i meihawl khur chu i tlawh anga. A kan zawh chin apiang kha lei a lo tla khuar zel anga. A tawp a tlak thlen hunah a vaiin i chhilh phui vek dawn nia. Hei hi a chhan chu meiling kha i chhin phui khan an thi vek anga, sa lutuk lovin meihawl i thur thei ang. I thur hunah a lu lam atangin i thur tan dawn nia.

Read more »

HTML zir ang (Chhunzawmna)

Khaile, post hmasa lamah HTML code ziah dan tlangpui kan sawi tawh a. Kan hrethiam tlang vek turah ngai ila. Tun tum ah hian post hmasa lam a kan sawi bak kan sawi chhunzawm leh anga. Hriat thiamloh kan neih chuan comment lamah ka in zawt mai dawn nia.

Awle, Website title dah dan hian bul tan ila. Title hi page tin ah dah vek theih a ni a. Head section chhungah title hi kan dah tur a ni. Title kan dah dawn chuan a code chu <title></title> hi a ni mai a. A open leh close na inkar ah hian kan title dah duh kha type mai tur a ni. Kan title dah duh chu TEST tih ni ta se, hetiang hian code kan ziak mai ang. <title>TEST</title> . Tichuan a HTML code kima kan dah dawn chuan hetiang hian kan ziak ang:-

<HTML>
<HEAD>
<TITLE>TEST</TITLE>
</HEAD>
</HTML>

Tichuan, i code ziah chu test.html tih emaw khan han save la, open rawh le. A hnuai a a lem a fei dum a ka kawhtir hi en la, tin a chung Firefox tih inziah na bul ami nen khian i en dawn nia. Heta lo lang hi a title kan dah chu a ni ta a. A title dang kan hmang duh a nih pawhin <title> leh </title> tih inkar a kan text dah kha thlak zel mai tur a ni.

Hetah hian kan hriat atan a pawimawh leh sawi hmaih theih hauh loh chu kan code open hnuhnun apiang kha close hmasak thin tur a ni. Entirnan, <head> ti a kan open hnu ah <title> kan dah a. Head close phawt hnu ah title hi close leh tur a ni lova. Kan open hnuhnun zawk title kha close hmasak tur a ni. Chuvang chuan, <HEAD><TITLE></TITLE></HEAD> kan ti ta a. Head chhunga title kan khung avangin head huamchhung ah title pawh kan close ngei tur a ni. Chutiang zel chuan a dang pawh tih zel tur a ni.

Tikhan title dah kan thiam leh ta a, mahse tuna kan zir chin ah hian kan webpage a lang tur pakhat mah a la awm lova. I open pawhin a blank tawp in a la lang rih dawn a. Post thar ah a chhung thu dah dan chu chhunzawm leh kan tum dawn nia.

Read more »

HTML zir ang

Tun tum chu HTML hi i zir ho ang u aw. Thenkhat chu hetiang lama tui vaklo in awm mai thei a, mahse in lo chhiar ve hram hram a ni ang chu.

HTML tih lampum chu Hyper Text Markup Language tih a ni a. A hman na ber chu website design nan a ni. Website design na hrang hrang PHP, Java Script, asp etc te awm nual tawh mah se HTML pawimawhna leh tangkaina hi a nep tak tak thei chuanglo a. Heng language dang hmanga design ho pawh hi HTML a in let chhuak lehin kan browser ah a nih tur anga rawn tarlan leh thin a ni.

Hetiang lam chu sawi thui lo mai ang. HTML chu zir tan mai ang aw. HTML hmanga website kan design dawn chuan a code ziah a ngai a. Chumi code ziah nan chuan software hman ngai a awm ve a. Chu chu lei emaw, download chawp emaw ngai lovin kan computer ah a awmsa mai a. Thu chhutna atana kan hman thin mawlmang tak Notepad emaw, wordpad emaw kha hman mai tur a ni.

HTML code ziak tur chuan a hmasa ber a kan hriat tur pawimawh em em a awm a. Chu chu < leh > hi a ni. Code kan ziah reng reng chu < leh > inkar ah hian kan khung vek tur a ni. A khawi emaw zawk zawk pawh hi lo ziah hmaih ila, kan code kha a diklo duai dawn a, a hnathawh tur ang a thawk thei thin lo a ni. Tin, HTML hmanga kan code ziah te hi kan duhtawk chinah kan close leh ngei ngei tur a ni a. Code pakhat pawh i close kim lo a nih chuan a diklo duai dawn a. A close nan hian < leh > inkar ah hian / kan dah thin.

HTML code reng reng chu <HTML> leh </HTML> inkar ah ziah vek tur a ni a. He code pahnih hi a bul tan nan leh a tawp khar nan a hman thin a ni. Hetiang hian HTML hmanga code kan ziah dawn chuan kan ziak ang:-
<HTML>
</HTML>

HTML ah hian code ziah nan hian Capital leh small letter a hman theih ve ve a. Chuvang chuan buai loh tur a ni. Awle, HTML bul kan tan ta a. HTML kan open a, a close na kan ziak tawh bawk a. A dawt leh ah chuan a head kan siam ang. Hemi section hi website a lang tel tur a ni lova, website cheina tur CSS link leh thildang pawimawh dah khawm nan hman a ni thin. A awlsam zawng in sawi ta mai ila, kan website title te leh thil pawimawh dang dah nan kan hmang thin.

Awle, tunah chuan <HEAD> code hi kan dahlut ve leh tawh anga, a hnuai ami ang hian tih leh mai tur a ni:-
<HTML>
<HEAD>
</HEAD>
</HTML>

A chunga code hi en ta ila, Head khi kan open avangin kan close leh a ngai a. </HEAD> tih khi a close na chu a ni ta a. Khitiang a kan close loh chuan nakin ah kan code ziah leh tur dang kha a ti buai vek thei dawn a. Chuvang chuan code eng chi pawh kan open chuan kan duhtawk kan tih zawh ah kan close leh ngei ngei tur a ni.

Kan hriat reng tur chu HTML hmanga notepad emaw wordpad emaw a kan code ziah chu kan save hunah text file anga save loh tur a ni a, html tih dah tel tur a ni. Tuna kan ziah chin khi han ziak ve la, test.html emaw test.htm tiin emaw save la. I file chu han open teh le. I browser khan a rawn tilang tawh anga, engmah kan la ziahluh loh avangin a blank tawp in a lang rih ang. I file save chu i edit duh a nih chuan right click a, open with ah khan notepad kha select leh mai tur a ni. Internet explorer i hmang a nih chuan View tih ah khan click la, Source tih kha select la, notepad in a rawn in hawng anga, khata tang khan i edit mai thei bawk ang.

Read more »

Chemte thlawk thei kan nei

Kan naupan lai khan CHEMTE THLAWK THEI kan nei thin a. Kha kan chemte thlawk thei avang khan thiante zingah pawh kan lar hle a. Tin, hlauh pawh min hlauh phah a. Keimahni rual tawk ah khan kan chemte thlawk thei neih thu kha a lar em thin avangin kan khua ah kha chuan naupang zawng zawng khan min hre vek a ni ber mai.

Kan khaw mawng lam naupang 'Chhanala' chuan a pu Nawla'n Bittol(Pistol) a neih thu a sawi pawh kha a lar viau na a, khang hunlai naupang ho khan pistol te chu cowboy Sudden-a te ho thawnthu vang khan kan hre hlawm viau tawh a. Chuvang te pawh chu a ni mahna, Pu Nawla Bittol aia kan Chemte thlawk thei a lar zawk na chhan pawh chu.

A nia lawm, khang hunlai khan cowboy ho vanga Pistol te kan lo hriat ve hle hlu tawh a, in draw lai te kan mitthla a, naupang pawnto thlenga Sheriff lo nei ve thin khan, Chemte thlawk thei ber kher hi chu kan la hre ngailo a. Khang hunlai a kan neih bak kha kan khua ah phei chuan tun thleng hian nei an awm thawm sawi tur pawh a awm lo. Hmun dangah te hian lo nei ve khiah te chu an lo awm ve mahna.

Khang hunlai kha chuan Indian kan nih leh nihloh lam kan sawi vul ve lek luk lova, hnam a chian leh chian loh lam kan ngaihtuah ve ngai heklo. India kha kan tan em em ringawt mai thin a. Bom mitnei te, atom bomb te, jet fighter te kha India khan kan ngah hian kan han hre khawp a. Thingtlang kilkhawr, electrict pawh luh mumal loh na hmun atang khan USA te chu kan cho em em mai thin a. Indo pawh ni ila India chu kan chak chiang sa ah kan ngai a, kan lo in tithei ve em em thin a. Chutiang khawp a India ram kan ngaihsan ai aia nasa chuan kan khaw naupang ho chuan kan Chemte thlawk thei avang chuan min ngaisang zawk a ni.

India han sawi tak ah chuan India kha kan han tan na thei thin khawp a. Kan khua ah khan Burma lam atanga rawn pem thla, sikul rawn kal ve thin kha a awm a. Insual a hrat in a kawlh si a, kan class a kan mipa lian ber nen khan an in mil lo lutuk a, an insual reng mai thin a. Keini ho lah chuan an insual tawh chuan, "India leh Burma an in do ve," kan tia, kan au dur dur mai thin a. India kha chu tan vet vet tak kan ni. Tun lai ah Indian ka ni lo tih vel kha kan nei ve lova, Indian kan ni e tih pawh a awm chuang lova. India kha kan tan em em ve tawp mai thin a ni. Ram leh hnam ah kan la chiang phak velo te pawh a ni mahna!! Nge kan lo chiang zawk daih?

Kan chemte thlawk thei kha a tha mai mai khawp a, khang hunlai ah kha chuan silai ai pawhin a tha in a hlauhawm daih zawk tih kha naupang ho zawng zawng khan an hre vek. A chhan chu kan hmanraw tha neih te kha lar tir kan duh a, midang htiattir kan duh chuan a thatna zawng zawng bakah dawt tlem belh a fak chawp kha a ngai thin tlat a ni. Khang hunlai naupang zawng zawng chuan khatiang a dawt tlem belh kha kan ching vek. Tumah in dem thei pawh kan awm lo. Engemaw chang phei chuan dawt sawi thiam apiang kan ngaihsan hunlai te pawh kha a awm a nia.

Kan chemte thlawk thei khan huhang a ngah bawk a a hmel la hmu miahlo pawh khan an hlau em em mai a. In tih thiamloh nikhua pawhin chemte thlawk thei kan sawi chhuah zeuh chuan bawkkhup in chibai min buk lo chauh zel a nih kha. A lar avang khan kan roh em em bawk a, mi nazawng en pawh kan phal lo. En kan phal sak te pawh kha an khawih chhin kan phal lova, an en chiah kan phalsak thin.

En tur pawh khan man chawi a ngai a. A man pawh kha a sang larh mai. India tangka khan kan nunah awmzia a nei lova. Siki a sweet mum tam tak kan lei theih hunlai kha a ni a. Pawisa kha keini tan chuan engmah a ni lo. Nei teuh pawh ni ila society dawr a sweet mum sen, lian bel bul lei nan bak hman na tur kan hre chuanglo. Khatiang taka pawisa kan mamawh loh avang khan kan chemte thlawk thei en manah chuan tui thak (meat masala rim nam ngat) te, sephung te, tangtial te, thlangdar te kha en manah kan la thin. Keini tan chuan pawisa aia hlu zawk a ni tlat. Thenkhat chuan chhuat min nawh sak te, tui min chawi sak te, school atanga kan in thleng a min puak haw te khan an en hlawh bawk. Kan venga naupang huai ber erawh chuan buaina ka neih apiang a ka ai awh a rawn inpe in ka en tir ta a. Ka bodyguard ah a tang nghal bawk.

Pakhat in a en chhin tawh kha chuan kan sawi bak tlem phuah belh in midang bul ah khan an sawi chhawng leh a. A la en ve lo te phei chuan en an chak em em thin. Keini lah chuan kan roh em em a, en duh an awm a, en man an neih pawhin kan en tir phal lawklo thin a. Chu chuan a ti hlu em em thin. Tin, a en tawh te pawhin a hnu lama en ten an sawi dan a danglam zel avangin en nawn leh an chak a, chuvang chuan vawi khat mai duh tawk lovin an en nawn fo thin. Chuvang chuan tlawn pawh kan hlawh a, a rei deuh hnu phei chuan a free a en thei chin kan siam a. A free a en duh kha an tam khawp a, hna thawk ah khan kan chhawr ngheng zel mai thin a.

Umn... a thui lutuk palh ange. He kan chemte thlawk thei hi Japan ral len laia ka pu (ka pa pu) rawn hawn a ni a. Kan chem hmuh thin pangai ho nen a inan loh avang hian a dangdai hle a. Chemte thlawk thei tih pawh hi awm ve tak a ni. Chu kan chemte thlawk thei chu ka pu atanga in rochung chhawng zel kan ni a. Chu chem chu Vai ho KHUKRI hi a ni e.

Read more »

Awlsam taka internet speed chak leh chak loh en dan

Tun tum chu ho mai mai post teh ang. Nokia handset leh PC Suite hmangtu te tan liau liau in aw ni ang.

Mobile phone a internet kan hman theih reng pawh hian PC ah connect ila, hman theih miahloh chang a awm thin. Hei hi kan phone in internet signal a hmuh thatloh vang a ni thin. Hriatloh chuan buai ve vak theihna a ni thin.

Hetiang a buai vak i pumpelh theih nan i PC leh phone thlunzawm a internet i connect dawn chuan internet signal i hmu tha em? A chak dawn nge dawn lo tih awlsam te a hriat mai theih a ni a. A hnuai a a lem hi en teh le.

A lem khi ngun takin han en la, Nokia PC Suite i hawn khan veilam sir ah khi khi i hmu anga. Phone sir dinglam a tung chho khi battery i neih zat a ni a, veilam a tung chho khi i internet signal hmuh dan a ni. A hring khian a thlen chhoh san poh leh a speed a chak dawn a ni mai. A hring a lan miahloh chuan i connect thei lovang. I thei a nih pawhin engmah i hawng thei lovang. Mahse mobile ah chuan i hmang reng thei tho ang.

Ka lawm e.

Read more »

Text color aiah Image hman dan

Thlalak emaw, photoshop a kan thil siam ah text kan dah in a color pangai aiah image a hman theih a, awlsam deuh in hetiang hian ti rawh le.

1. Photoshop a i thil siam ah chuan i text dah duh chu type la, a font ah hian a phek hlai apiang a tha a, Impact tih te, Arial Black te.


2. A color aia i hman duh image chu open leh la, chuan i thlalak/text chei tur lamah chuan Move tool(V) kha select la, pawt lut pawp rawh le.


3. I thil siam chu i color hman tur chuan a hliah bo vek ang. Mahse buai duh suh, keyboard ah khan Ctrl leh G hmet rawh le.


4. Kha zawng kha ani e.

Read more »

Nokia mobile handset modem a hmang a computer a internet zawm dan

He thu hi chu kan hre theuh tawh in a rinawm a. Amaherawhchu sawi belh duh leh kan hriat thin dan a diklo lai te siam that ka duh avangin ka rawn post ve ange.

Mobile handset modem a hmang a internet PC a connect tur chuan USB cable emaw, bluetooth hmanga computer thlunzawm na tur kan neih tel a ngai a. Tin, a pawimawh ber chu Nokia PC Suite software emaw, Nokia OVI Suite emaw, computer a hman tur kan neih a ngai ang. Heng software pahnih te hi HETAH hian download mai theih a ni e. I phone mil tur i hmulo a nih pawhin lungngai lo la, a tih dan kan la sawi dawn nia.

Awle, i phone mil a awmlo emaw, hmun dang atanga download i lo duh zawk emaw a nih chuan hetiang hian ti rawh le. I USB cable hmanga i phone leh computer i vih zawm chiah khan i phone ah khan duh thlan tur a lo lang thin a. Nokia PC Suite tih emaw, Nokia OVI Suite tih leh Mass storage tih a lo lang ang. I hriat tur pawimawh ber ni ta chu PC Suite nge OVI Suite tih kha lo lang zawk tih kha lo chhinchhiah ang che.

Kan mithiam thenkhat ten PC Suite leh OVI suite hi hman pawlh theih vek ang leh, Nokia hmang tawh phawt chu PC Suite hmang tura lo ti vek te, OVI Suite hmang vek tura lo ti an awm thin. Engemaw chen ah chuan hman pawlh theih chu a ni meuh mai, kan hmanpawlh chawk a. Mahse kan handset model azir in a software hman te a danglam ve zel a, chumi avang chuan Nokia lama an mithiam ten kan hman tur awlsam taka kan hriat theih nan hetiang a USB cable han zawm veleh a lang tur hian an dah ta a ni. OVI Suite tih i phone a a lan chuan OVI Suite hmang mai la, PC Suite tih a lan chuan PC Suite tih hmang mai la. Khawi lai emaw a inti hre deuh in duh duh hmang mai tura a hrilh che kha ring duh suh. Nokia siamtu ten uluk taka an siam hnu ah hman tur zawk tia an dah thlap kha hmang la, nakin zel thlengin i inchhir lovang.

Tin, OVI Suite hmanna tura PC Suite hman tlat te, PC Suite hmanna tura OVI Suite hman tlat avang te hian problem hrang hrang a awm ve thei a. Ka computer in ka phone a hmu theilo tih te a awm duh. Tin, internet speed pawh hi a ti muang ve thei a nia.Tin, software in mil i hman a i tih theih tur tam tak kha a millo i hman chuan tih theihloh i nei nual thei bawk a ni.

Awle, ti chinah hian duhtawk phawt ila, tunlai software chhuak thar ah chuan settings siam ngai lovin amah ah automatic in a hmu nghal zel tawh a, i hriat reng tur erawh chu Nokia PC Suite tih emaw OVI Suite tih emaw kha chu i phone ah khan i select ve a ngai a nia.

Read more »

Windows live CD siam dan

Windows live CD kan tih chu windows load sa disc a write chhuah a, chumi hmang a computer hman theihna ti mai ila kan hrethiam em ang chu maw. Live CD hi ka hmang tangkai em em thin a, a bik takin virus in ka computer a tih buai chang te hian ka hmang tangkai em em thin.

A that leh na chu tunlai a kan hman lar em em Hiren boot CD ang thio hian kan software duhzawng te dah sa theih vek a ni a. Heng hi install nawn kher ngai lovin install sa hian disc ah write chhuah a hman nghal mai theih a ni. Tin, antivirus leh software eng eng emaw chhuak thar a awm in update ve zel theih a ni bawk.

Awle, tunah chuan a siam dan lamah kai dawn ila. Eng software te nge ka thun ang? tih chu keimahni a hmang tu te duhthlanna ni se. Live CD siam tur chuan heng te hi i mamawh:-
1. Bart PE
2. Windows installation CD

A hmasa ber ah chuan Bart PE Builder download phawt mai la. I install anga. I open hunah a hnuai a a lem ang hi a lo lang ang.

I software dah duh zawng te chu Plugins tih button ah khian click la, i duh zawng kha i select mai dawn nia. A awmsa bakah dah belh i duh pawhin HETAH hian download mai tur a awm. I download zawh ah Plugins tih folder chhung ah khan i dah mai dawn nia. I duh ang i tih zawh tawh chuan Windows Installation disc chu i CD/DVD drive ah thun la.(hei hi hard disk ah emaw copy sa i neih pawhin a hman mai theih. A chung ber a source tih ah hian i CD/DVD drive emaw, file i copy sa chu i select dawn nia. Hemi i tih zawh hian Plugins tih button ah click la, a hnuai a a lem ang hi a lo lang ang.

I software thun duh ho chu enable vek la. I duh i select anga, enable/disable tih button a click a ni mai. Software dang thun belh i duh chuan Add tih ah khan i click dawn nia. Hemi i tih zawh chuan Close button ah click leh la.Chumi zawh chuan Build tih button a click a ni tawh mai.

Disc a write chhuah nghal i duh chuan Burn to CD/DVD kha select la, enchhin phawt hnu a write i duh chuan Create ISO image ah khan click la, a file rawn insiamna tur kha i duh i select mai dawn nia.

Hemi i tih zawh chuan i computer kha virus vang emaw, Windows ah diklo engemaw a awm vanga i computer a buai emaw, a nun theihloh emaw chuan i CD/DVD drive ah thun tawp la. I windows load sa chu a mah in a in run anga, i duh chuan hnathawh nan pawh i hmang nghal thei.

Read more »

CFL Hmingthanga

Mizo Hlakungpui Mual website buaipui in September ni 9, 2012 zan ah chuan ka thu kar mai a. A tuk lam hna thawh duh bawk nen, zan dar 10 vela mut mai tum kha ka net lam speed muan em avangin dar 10 chu ka pel chiang hle. Chutia thil dang ngaihtuah map lova ka awm lai chuan dar 10:30 velah chuan kan Branch YMA Information chu an rawn ti ri kauh kauh a, kan branch president chuan he chhiat tawh thu hi a rawn puang ta a.

Ka hriat tirh chuan zaithiam lar hi a ni tih reng reng ka hre miahlo a. Chutia khual khua atanga mitthi awm ta chu kuang siam te a ngai dawn sia tiin ka thil tih lai chu ka dah a, damdawiin lam pan chuan ka chhuak ve ta nghal a. Chutia ka kal kawng ah chuan a ni Zaithiam lar CFL Hmingthanga kha a ni tih ka hriat tak chu.

Zaithiam lar CFL-a ngei kha a ni tih ka hriat tak ah chuan amah hi Aizawl lam mi emaw ka lo ti leh char char pek a. Aizawl lam mi ni si helam ah, Mizoram khawchhak kil tawp thingtlang khua a a rawn thi ta mai chu mak ka ti hle a, ka sawichhuak lem lo hlauh kha ka vanneih pui ta. Sawi chhuak ila chuan ka kalpui te khan bengvarlo min va ti dawn em!! Damdawiin kan thlen thlak hnu ah a hming an tar chu ka en a, chuta tang chiah chuan Samthang khua a ni tih ka hriat tak chu. Bengvarlo theih heih heih khawp mai.  

CF Laihmingthanga hi Ni 7.9.12 khan Khawbung PHC ah admit a ni a. TB leh zunkawng natna hmuhchhuah a ni. Theihtawp chhuah a enkawl a nih hnu in Ni 9/9/'12 dar 10:25 pm khan Khawbung PHC-ah a boralin a ruang hi a tuk zing dar 1:00 am khân an mahni khaw lam Samthang panpui a ni.

CFL-a hi kum 1970 November ni 5-ah Samthang khua ah a piang a. Khamliana(L) leh Tâwksungi(L) fapa a ni. Naupang fel leh lehkha thiam thei tak a ni a, rokhawlhna avangin lehkha hi Pawl 6 thleng chauh a zir a. A hla thenkhat-ah te phei chuan Saptawng te pawh a tel ve nawk nawk bawk a. A thlen phâk tâwkah chuan mi vengva ve tak a ni.

Zai mai bakah hlaphuah lam pawh a ti mi viau.. Hla hi 150 chuang zet a phuah. Naupang kum 15 vel anih atangin a zai tan tawh a. Zoram pum huap a a lar na chu 1993 June thla a 'Ngaihlai Masang' tih cassete a release atang khan a ni. A zai(aw) hi All India Radio-ah te khungin Music Video leh Audio Album 13 zet a siam bawk a. Music lamah hian a tuiin Tuipuiral huap zai intihsiakah te lawmman a la fo tawh bâkah Tuipuiral Beat Contest an neih ṭhin lai pawhin Lead Guitarist a lo ni bawk ṭhin.

A thih thu hriat a nih vêlah hian amah lainattu ṭhenrual ṭha leh khawtlâng, YMA nula tlangvâl te chu Khawbung Damdawiin lam panin an tlân a, ka zuk thlen thlak ve meuh chuan damdawiin tual vel ah chuan mipui an lo zi nauk tawh hlawm a. Tichuan he khawvel a CFL Hmingthanga ka hmuh hmasak ber leh hnuhnun ber na ni turin damdawiin khum a a lei taksa mu bam chu ka va thlir ve zawk a. Han tih theih vak dang ka nei tawhlo bawk nen, kan section ah a kuang hi siam tur an lo ti bawk nen kuang siamna lam panin ka kalsan ta a. Kuang siamna lamah pawh a zai nei tawh phawt chuan an play a ni ber e, a ri sup sup mai.

Khawbung Branch YMA te'n kuang siamin Samthang lam panpui turin an in buatsaih ta a ni. Zinglam 1:00pm velah an khua Samthang hi ama hla play chungin panpuiin 'Tuipuirâl Lelte' tia koh ṭhin chu ropui takin an khua Samthang chuan an lo hmuak a ni.

CFL tih hi a pa Chhangte, a nu Fanai hnam hming hi a kaikawp niawm tak a ni. L hi chu a hming taka 'Lian' hmingthanga tih aṭanga a lâk a ni thung. 

A hla sak te hi ama phuah deuh vek a ni a, Cassette Vol-I atanga X thleng a siam tawhah hian ama phuah deuh vek a sak avangin hla 100 chuang zet chu a phuah tawhin a lang. A cassette siam tawhte chu :

1.Ngaihlai Masang

2. Roosena Hmeltha

3. Chhânlet loh Hmangaihna

4. Kũr diam diam

5. Min hriatchhuahtir

6.Lâm dun ang aw

7. Tunge hmeltha ber

8. Hlim la, nui rawh

9. Hla inchhang special 10.Lemchanna Khawvel

Heng a cassette siamte hi kum 1993-2000 inkara a tihchhuah vek an ni.

[ Ref. : Mizo Zaithiam Larte Chanchin by Lalthlamuana ]

C.F.L-a hla thenkhat han tarlang ila:-

1. Bawihte nangnen

2. Chhan let loh hmangaihna

3. Chhuahtlang hmun hlui

4. Duhaisam a kim

5. Dawn tisei

6. Hmangaihna rose par

7. Hmangaihin hmangaihna

8. Hmangaihnaa phuar

9. Hmangaih CFL

10. I mawi chuang e

11. Intawng leh ngei ang aw

12. I tan ka lo kir leh

13. I tlai lua

14. Ka star no.1

15. Ka D tawn hun tur

16. Ka lung a leng mange

17. Kan duhaisam

18. Ka nau vala

19. Ka thian ngaihawm

20. Ka thianghlim tawh lo

21. Khuavang kallai

22. Khuavang chhinchhiah

23. Kan hlim laini

24. Ka hmangaih ber i ni

25. Lanu lungmawl

26. L.D.Hmeltha

27. Min kal san suh

28. Min thlahliam ang che

29. Mitthla alang hlimthla

30. Muttui mangtha

31. Min hriat chhuahtir

32. Nang chauh ka hmangaih che

33. Ngaihlai Masang

34. Phu loh 'D' chhai zawnga ho mai mai

35. Phu loh dawn thar

36. Rauthla 'D'

37. Thang nuihiauvi

38. Tawn ni i awm si lo.

39. Then che ka hlau ber mai

40. Then lohna ram

41. Tah loh mittui tlak

42. Valtin lawri

43. Zo nun mawi

44. Zawlaidi

45. Zokhaw tleitir

46. Kur diam diam

47.Roosna Hmeltha

Etc. etc.etc.

(Note:- A thlalak hi ka phone in ka la ve na a, a thim lutuk a. Pu Mapuia Hnamte lak hi ka rawn dah mai e.)

Read more »

Adobe Photoshop hmangin hmui ti sen ang

Facebook a Adobe Photoshop Helpline group a ka post hi kan khilai ang che u.

Nula hmeltha tak thlalak i edit a, lipstick a lo in hnawih lova. Hetiang hian a hmui ah lipstick i han hnawih sen sak dawn ang hmiang.

1. Photoshop hawng la, Photoshop 7 ka hmang a.

2. I thlalak edit duh chu open rawh le.

3. Layers tih ah khan Background tih ah right click la, duplicate layer kha i select dawn nia. Chuan OK i click leh ang. Chuan Layer pahnih a lo awm tawh anga, a hnuai zawk (background tih inziahna kha) ah i right click leh anga, delete ah i click dawn nia.

4. Lasso Tool select la,

5. Lasso tool hmang chuan a hmui i tih sen duh chin chu thai kual pawp mai rawh le. A hmui chin chiah kha select a ngai chuang lova, tlema zau deuh hlek pawh a pawilo.

6. Thlalak ah chuan right click la, Layer via copy kha i click dawn nia.

7. I layer chu han en la, pahnih a lo awm tawh ang. Layer chung zawk kha i edit tur chu ani ta ani.

8. Curve select la, Keyboard ah Ctrl leh M hmet la. A thim zawng in i pawt thla dawn nia. Hemi aiah hian Ctrl leh B hmet in color adjustment hmangin a siam theih bawk.

9. Eraser tool i select anga, a hmui chin bak sen zawng hi uluk takin i nawt reh leh vek anga.

10. Filter atangin Gaussian Blur i select anga.( Filter>Blur>Gaussian Blur). Chuan 1.0 ah i dah ang.

 

11. Layer opacity kha 70% vel ah i adjust leh anga.

12. Ti khan kan siam zo ta a, a save theih tawh e. A hnuai ami hi a original leh chei hnu ani a, han en chhin teh le.

Read more »

Capacitor

A capacitor is classified under passive electronic components. It consist of two conducting surfaces separated by a layer of an insulating material called Dielectric. It allows the passage of AC but block DC.

Types of Capacitors:

A few of the commonly used capacitors are as follows:-

1. Mica Capacitors:- It consist of a series plate made from Mica material which are connected together and separated by the dielectric. Mica capacitor have very low power factors on AC and hence they are very suitable for use at Radio Frequencies.

2. Ceramic Capacitors:- It consist of disc of ceramic material whose opposite faces are coafted with metallic silver. The ceramic disc acts as the dielectric and silver coatings as plates. Ceramic capacitors also have very low power factor and is very suitable for shortwave work in radio.

 3. Paper Capacitors:-  It usually consist of metal coils made from aluminium or copper or tin with thin paper impregnated with oil or wax. They are suitable for use in audio frequency stages of radio receiver as bypass capacitors.

 4. Electrolitic Capacitors:-  They are neither wet type or dry type. The wet type consist of an aluminium annode with an electrolytic solution of ammonium borate as cathode. The dry type capacitors consist of positive and negative electrodes of aluminium foil separated by porous paper containing electrolytes. Due to their high capacitance, they are used in smoothing circuits in radio work. For successful operation, such capacitors must always be used with proper polarity.

Read more »

Puan thui khawl

Tun tum chu kan nitin khawsak na a pawimawh em em, a pawimawh ti a kan hriat langsar tak ni silo, Puan thui khawl chungchang hi kan zirchian pui hlawm teh ang che u. :-D

Puan thui khawl hi a pawimawh khawp mai a. Kan thawmhnaw inbel mawi tak tak te hi puan thui na khawl atanga lo chhuak a ni a. Hetiang taka pawimawh nisi hi a lar ta lo em em mai a. Tunlai ah phei chuan puan thui ho bak chuan a hmuh pawh kan hmu khat ta hlawm viau mai.

Puan thu khawl hi kum 1790 khan English inventor Thomas Saint chuan a lo hmuchhuak daih tawh a. Khami hmalam leh a hnu lam hun engemaw chen kha chu kut hmang a thui vek a ni thin a ni. Tichuan khang hunlai a an khawl kha ti danglam a ti changtlung chho zel in tunah chuan electrict hmang chi te pawh a awm tawh a. A hman pawh an hmang nasa tawh viau mai.

A part hi a ho angreng hle a, tun tum ah chuan electrict hmang lo ho, kut leh ke khawl ho chungchang hi zir ho ta ila. A hnuai a a lem hi ngun takin lo en phawt mai teh le.

Takeup lever khi khawl hrui var mar tu ti mai ila hriat a awlsam ka ring deuh a. Tension regulator ah khian a hrui a lo chhuk thla a, khi khi a khawlla lo pawt khawng tu leh adjust na pawimawh tak a ni. Chuan needle clamp ah a hrui chu rawn chhuk leh in khawl hriau beng ah kan thil ta thin a ni. Feed Dog khi hnuai lam atanga puan lo nawr kal tu thir tial ki nei kha a ni a, a pawimawh hle. Shuttle Race khi Bobbin vihluhna, a hnuai lam hrui awmna a ni bawk.

A chung a a lem hi en leh ta la. Spool Pin hi khawl la hlum dah na tur a ni a. Stitch Regulator khi a khawl ha kal khat zawng adjust na kha a ni leh a. Drop Feed Knob khi picture chung zawk a Feed Dog adjust tu khi a ni a. Kan hriat awlsam dan tur chuan puan chi hrang hrang thui dawn a select na kha a ni. Khimi kan herh dan a zir khian Feed Dog kha a pawng chhuak in a tlum lut thin a. Chu chuan puan chhah deuh leh pan deuh thui hunah nasa takin a pui ta thin a ni.

Awle, tun atan chuan ti zawng kha ni mai rih sela, post thar ah kan chhunzawm dawn nia.

Read more »

Software/Driver Updater

Kan computer a kan software hman te hi khawvel changkang chho zel leh thil tha zawk chhuah zel na avangin a thar ber kan hman a kan neih ve fo a ngai thin. Hetiang kan neihloh avang hian mi hman ang te hmang ve theilo a kan awm chang a awm fo thin.

Tin, a bik takin internet hmang nasa ho tan phei chuan a thar ber zel hi neih a tul chin a awm fo mai. Chutih rual chuan i khawl ah khan eng software nge i hman? Eng verson nge i hman? I hman lai aia thar kha a chhuak tawh em tih zawn chawp fo mai a ngai thin.

Hetiang hi i pumpelh theih nan a hnuai a software ho hi download la, tichuan i buaina tam tak chu awlsam te a chinfel a lo ni tawh mai dawn a ni.

1. Driver Identifier : He software hi i computer a i driver hman te zawng chhuak a, a thar ber download theihna tur link pe zel thei tu tur che a ni a. Computer-a windows load that chang a motherboard driver neih remchan mai loh te hian he software hi a zawn nan ka hmang thin a. A tha vei khawp mai.

2. FileHippo Update checker: He software hi chuan i computer a i software hman hrang hrang te a zawng chhuak ve thung a, a thar ber download na tur link nen lam a rawn pe nghal thei bawk che a ni.

Awle, heng ho hi han hmang chhin la, heng aia tha leh hmantlak a awm anih phei chuan min hrilh ve dawn nia.

Read more »