Kan naupan lai a Krismas kan nghahhleh thin zia kha aw... Nuam hi kan ti thei thin khawp in ka hria. A chhan chu thawmhnaw thar kan nei a, exam kan zo tawh bawk a kan pharvar thei tawh a, zan ah tv kan bihthla man tawh a, kan in bihruksiak hman tawh a, ruai theh a awm dawn vang a ni.
Krismas ruai theh hi nuam kan ti thei khawp a. Ruai thehna tur changel hnah lak hi naupang ho kutah a awm thin a. Laltha-a pa(MST) driver in kan khua ah mas a rawn hman chuan kan lawm thei hle a. A chhan chu MST hi let tawh lo in a cham pui thin a, chu chuan hnah kan la thin. Motor te chu sawi loh, Ngunduha bawngtawlailir pawh chuan ve chak a um luih luih thin kha kan nia. Pu Thiangbala te ho in Jeep tawng deuh an nei a, tlan chhuah dawn apianga running ngai, anih loh pawhin herhnun ngai. Herhnun ngai kha chu a la tha viau ah kan ngai a, running ngai chin kha chu a tawng ve viau ah kan ngai. Thui tak tak kan nam lirh sak a, a nun theih lawk loh phei chuan thlan tla phung in kan nawr kual thin. Hetiang anih avang hian MST, running ngailo leh a seat pawh dup tak maia ruai theh na tur hnah han lak vel kha nuam kan ti a. Veng dang lakah pawh kan inchhuang hle thin. Ani hi a awm loh chuan tawlailir ke 4 nei, a bracket vel kan siam thlap, TAWLAILIR PUI kan tih chuan hnah kan la thin.Tum khat chu heng tawlailir pui hian hnah kan la a. A brake awm hauhlo khan kan keng ve tawp mai a. Tichuan tawlailir a changel hnah khat tlata kan dah hnu chuan kan chuang dawn ta hlawm a. Mahse hnah kha rah chhiat kan hlauh avangin a chung a chuan an phal ta lova. A bracket ah chuan kan chuang a, kan in dawm far hlawm mai a.
An tlan ta ale.... A brake awmlo tih takah a chak thla ta khawp mai a. Ka hlau khawp mai a. Ti ding turin ka au tuar tuar a, mahse a brake awmloh thu in min chhang ta si. Chutah kawng kawi ah an kual pawp mai a, ka lo in chelh hneh tawk lo bawk nen, kawngpui la metalled loh ah chuan ka tla khu chum chum mai a. Ka lum tawp tawp bawk a. A na hi kan ti mai mai khawp a. Ka kekawr khup leh ka kawrban tlawn kiu vel chu a pawp hlawk bawk a. Tichuan, ka thiante chuan thlang deuh lawk ah chuan kawngchhak lam kopang an su a. An ding ve ta a.
Hmanhmawh tawk in an rawn tlan chho hlawk hlawk hlawm a, ka thin a rim deuh bawk nen, ka lo thi der ta a. An rawn mangang khawp mai a. Thenkhat an lo tap, thenkhat in ka mar an zawng vel, thenkhat in thiante an lo mawhpuh bawk, an buai ta luih luih mai a. Ka nuih a za ru angreng khawp a, ka nui chhuak lek lek ani. Nakinah chuan kan thian pakhat chuan Damdawiin lama min kalpui vat a rawt a. Tichuan tawlailir thleng chuan min zawn tla ta a.
Chutia min han zawn tak ah chuan ka nuih a za ta tlat mai a. Tawlailir chunga min mut rual chuan ka nui chhuak ta a. Ka thi der tih an hriat chuan min ngei hlawm lutuk chuan min chum pawp pawp hlawm mai a. Kan hlim phian.....
Tunhma chuan hnah ah hian Mas ruai kan kil ho thin a. Naupang hnah la hlui tur kha a special in min siamsak thin a, a tui deuh hlek kan ei thin. Tunah chuan thleng vek an hmang ta, tunlai naupang te chuan hnah lak awmzia leh lo hlimawm thin zia kha an hre ve ta lo....
A ngaihnawm khawp mai. I thih der laia i thiante hrilhhai tur hmel ka mitthla a, khawngaihthlak bawk si, nuihzatthlak bawk si! Haha.. Tawlailir-te i rawn ziak a, ka lung a tileng.;-)
ReplyDelete@ts, i lo lenglut thin a ka lawm e. Ka website lamah te pawh hian i lo lenglut thin dawn nia.
ReplyDeleteI va han sual mai mai tak e! kei chu ni ila, ka piai hrep ang che, hahaha(fiamthu). Lung i ti leng thar hle mai, kei pawh, in accident ang khian vawikhat naupang, naupang tak tete ka phur a, ka khalh thiam tan tir det det lo nibawk nen, kawngkawi a kan han accident mai kha chu(h), nu hovin min bauh ta hrep anih kha. vanneih asiamin tumah kan na em em lova, mahse a zawngchhan chi loh khawp mai. Tin, hnah lak hi nuam ka ti ve viau thin bawk, hnahthial leh banhla, changel hnahte kan la thin, Hnah chung ngeia ruai kil ho kha ava nuam tak em aw! Mak ve tak mai chu, South indian ho hian, restaurant changkang ve tak ah, hnah chungah chaw ei an ching ve thin a, Ka thianpa South Indian ve tho hian chutiangah chuan min hruai tawh a, amak ka ti khawp mai
ReplyDelete@hmelthate, hnah chung ngei a ruai kil kha tun thleng hian ruai angah ka la ngai. Tunlai a thleng a kan buffed ang hi chuan ruai theh ah ka la in ngai theilo.@hmelthate, hnah chung ngei a ruai kil kha tun thleng hian ruai angah ka la ngai. Tunlai a thleng a kan buffed ang hi chuan ruai theh ah ka la in ngai theilo.
ReplyDelete