A nia sin, khatia kg 91 lai mai a rit ka ni tih ka in hriat khan, MBI ka han chhut a, overweight ah pawh ka rih tur let 2 deuh thaw a ni tawh tih ka hre thei a. Thau luat avanga natna kentel tur a neih zawng zawng khan min bawm nghal.
Ka taksa a chaklo a, lu na, lu hai, luak chhuak, ngal vung etc ka neih phah bawk. BP sang nei sa ka ni a, ka eizawnna lah hi che lova nileng a ṭhut ngai chi a lo ni bawk si. Rei vaklo ah zunthlum ka nei ang tih ka in ring.
Ka rilru a awm hmasa ber chu cher ka ngai tih kha a ni. Ka BMI a normal weight chu Kg 62 a ni a, chumi tur chuan nasa taka ka weight ka paih a ngai. Excercise lak ka mamawh a ni.
Exercise chu ka la ve ngei a, ka rih em avangin nasa takin ka la ngamlo a, hah tham a chak erawh chuan ka kal ṭhin a, chaw pangai ei lovin thla khat chhung kha Oats chauh ka ei bawk. Ka weight chu a tlahniam duai chuanglo naa, keimah chu ka zan phah huai tlat.
Vanduaithlak takin Tlawva Mini Hydel Project power pekna hrui siama kan vahchhuahna ah kham ko atanga ka chhuk ka chesual a,ka ke rek ruh ka rap pelh a, excercise ka lak zawm thei talo. Damdawiina ka ke Xray tir pahin doctor hnenah chuan, exercise ka lak theih tawh dawnloh avangin cher na damdawi min chawh mai turin ka ti a. Doctor chuan nui chungin cherna damdawi a awmloh thu min lo hrilh a, ka bei a dawng teh e.
Doctor chuan sawi zawm in, cher i duh chuan Dietician number ka pe ang che, i rawn dawn nia min ti ta a. Ka thla a ti muang huai thei nia. Chu thu chuan keimahah beiseina thar min pe a. Ka rilru a thau paih tura min zai mai thei tur zawn pawh chu chu thu ka hriat avang chuan ka cancel nghal a. Tichuan cher tur chuan ka inbuatsaih chho ta a.
