Website ka siam ve a

Thupui ah website kan ti ve tawp mai a, ka phuah fuh nge fuhlo pawh ka hre lemlo.

Computer hi hun engemaw chen chu software leh hardware ka zir ve e ka tia. Ka tuina zawng a ni bawk a nuam ka ti in ka zir chin chu ka thiam ve khawp mai. Amaherawhchu kan zir laia ka thiam viau pawh kha ka practise zui loh avangin tunah phei chuan ka theihnghilh nual tawh nghe nghe.

Computer ka zir lai khan web desining lam kha kan zir ve a. Zir tur list ah khan website siamna language hrang hrang zir tur kha kan duh kan thlang a. Khang hunlai khan ka la hre tlem bawk nen, html leh php kha ka thlang a. Javascript tih vel kha a tangkaina leh a hmanna tur lam reng reng ka lo hre hlawm lova. Tun hnu ah hian ka in chhir thin.
 

Kum 2011-a Mizo Hlakungpui Mual Silver Jubilee lawm anih dawn avangin Hlakungpui Silver Jubilee Committee pui chuan sub-comt. peng hrang hrang a din a. Information & Publicity ah min rawn ti tel ve a. Kan hna hmasa atan website siam an dah a. Tichuan kan buaipui chho ta a, kei leh ka thianpa Tluanga bak chuan website siamdan tur kha hria kan awm si lo a. Tluanga chuan Joomla hmanga siam a rawt a. Tichuan kan han buaipui chho a, mahse ka thianpa hian hmun dangah zirna lam vangin min awmbo san ta si a. Tichuan keimah chauh in ka buaipui ta a. A page awmdan phung tur kan ruahman chhin ang khan Joomla hmang a kan siam theihloh avang leh website kha peih fel vat kan duh avangin Microsoft Publisher hmangin ka siam ta a. Tichuan ka upload ve ta rawih a. Mahse browser thenkhat ah a lan theihloh avangin a hran a siam leh ka duh ta a. Tichuan html code hmang chuan a hranpa in ka siam leh ta a, a code zawng zawng type chhuah nen chuan hautak rem rem tak ani. Tichuan tuna www.hlakungpui.com hi html code zawng zawng nena ziak a ka siam ve liau liau a ni ta a. Zawi zawi a tih changtlun kan tum kha kan hotu lam atangin password min pek duh loh avangin a tir a ka siam ang ang khan a la awm ta ani.

Tihchangtlun nan php hmangin ka siam leh ta a, mahse kan hotu lam in an upload thiam ta tlat lo maia, password min hrilh duh bawk si lo a. Tichuan remchang ah hmangin ka programme ziah sa tlema ti danglam in website hran ka siam ta a. www.samtea.in chu ka buaipui chho leh ta a, tunah hian ka peihfel tawh a. Ka enkawl chho mek bawk ani.

Website siam hi a hautak angreng khawp mai a. Sum leh pai bakah tha leh ngaihtuahna tam tak sen a ngai a. A hahthlak vei angreng khawp mai. Ka sawi leh duh mai mai chu mizo te hian mi thil siam sa kan hmang nasa lutuk hi a thalo ka tia. Website ah ngat phei chuan thiam tak tak a ka ngaih te pawhin mahni a programme ziah tum aiin a awmsa eg.wordpress te kan hmang thin a. A that viau rual in mahni ngei ina kan siam theih chuan hei tluka hlu hi a awm in ka hrelo.