Home » » Upeka

Upeka

Kan naupan lai khan sek nih te, lian nih te, chak nih te kan chak thin a. Chung zawng zawng chu a neih vek avangin Upeka nih kha kan chak thin.
Kan u te rual daih a ni a, a nau te ho nen kan inrual tawk vel a. Mahse kan inkawm ngeih em em tho ani. Upeka hian hma takah nupui a nei a, an inneih hian kum 18 vel a ni a. An nu hi kum 15 vel a ni bawk. Mak em em chu naupang taka innei si kha vawikhat mah an inthen lova, an inhauh kan hre ngai bawk hek lo. Hetiang taka pa fel leh zaidam hi Kohhran lamah pawh an chhawr tangkai em em a. KTP ah phei chuan a hunlai khan Leader a ni char char ani. Chutiang khawp chuan member te pawhin kan ngaina a, kan duh ani. Amaherawhchu mihring hi a famkim vek theih lova. A pa te hian zu an zuar tlat mai. Upeka hian a vei em em thin a, kohhran ah pawh hmang nasa in duh hle mah ila hei hian nasa takin amah ah inthlahrunna a neih tir a, a khawngaihthlak thin hle ani.
An zu zawrh thin titawp tur chuan theihtawp a chhuah a. An chhungkua hi an rual a, eizawnna kawng han ngaihtuah in sawrkar hna thawklo nafam chuan zu zawrh mai pawh chu thil awl tak ani ngei ang. Chu chu kum 15 vel bawr Upeka hian a hre ve kar mai. Mahse a nu leh pa te chu bansan turin a ngen reng a. An lu chungah kut nghat a tawngtai in zu zawrh bansan duhna thinlung an put theihnan Pathian a au thin a. Amah pawhin hna a thawk rim in an zu zawrh an bansan theihna anih phawt chuan a taksa chau leh na themthum te pawh chu engah mah ngailo in thahnem ngai takin hna a thawk a. Amah a tang bawk a, a zawhtawk bak in hna a thawk a, chu chu a taksa pawhin a tuar tan ta ani.

Tichuan hun a kal zel a, a nu leh pa te pawh chuan an hmaizah avangin zu zawrh chu an bansan ta a. Tunah chuan kohhran lamah pawh a kul atai a kan mi hman te an ni tawh ani. Hetiang a mahni nu leh pa, chhungte bula missionary hna ropui tak thawk tan thei hi an vang hle awm e.A hnathawh hah avanga a taksa na chu a zual zel a, heti chung hian a theihtawp chhuah in a thawk zawm zel a. Chhungkaw chawm bakah a nau te pawh a chawm tel a. A nau chiah hian Hindi Bth. zir zo tawhin missionary in a chhuak mek a. A nau mipa pakhat pawh velore ah male nurse in a awm a, nipa pakhat chu Assam Regiment ah a tang mek bawk.
A taksa chuan chhiat lam a pan telh telh a, a chau ta vak mai a. A vung chiam bawk a. Tichuan Aizawl lamah inentir turin an kal ta a. A natna ber an hre fuh thei lawklo a. A tawp ah chuan TB ani e tiin TB treatment a la ta a. A natna an hrefuh ta chu kan lawm tlang hle a, a tha chhuak ve mai turah kan ngai a. Amah pawh a hlim hle ani.
Tichuan damdawi a ei chho a, a tha mai tura kan ngaih laiin a tha thei ta tlat lo mai a. A kum leh ah chuan Aizawl panpui leh a ni a. Doctor hran an pan ta a. Chuta an lo en na ah chuan TB nilovin Lung lam thalo ani tih an lo hmuchhuak ta a. A damdawi ei lai pawh chu tihtawp nghal vek ani a. Tichuan lung lam thalo enkawl in an enkawl chho ta a. Amah pawh chu a tha chho chak in reilote ah hna te pawh a thawk thei ta nghal mai a. Amaherawh chu chhungkua bakah a nau te lehkhazir chawm anih avangin a thawk hah em em maia. Tichuan a natna ngai bawk chuan a rawn tibuai leh ta a.
Aizawl lamah te inenkawl leh mahse a tha thei tak tak tawh lo va. Chaklo tak chungin a theih tawk pheikhawk chhe siam chu a la thawk tho thin. Chutiang anih mek lai chuan a nu leh pa te chuan an indan tir mauh maia. An in leh lo thar zawng zawng chu an mahni kutkawih liau liau in an sual chhuak leh ta a. A nau te ho pawhin hna te an lo nei chho tan a,  a chhawr ve hman dawn tan chiah tih ah chuan a chau leh ta a. Tichuan hma sawn theilo in a chaklo tial tial a. Kumin November thla tir khan a boral ta ani.
A nun ah hian entawn tur tam tak a awm in ka hria. A inpekna te, Pathian a tih tlat na te hi a ropui em em a. Pawn chhuak theilo a kum khat dawn thaw a awm chhunga a chak ber chu Biak in a inkhawm a Pathian fak ani. Mahse a taksa lamin a tlin loh avangin a inkhawm thei thin silova.
Tin, a zaidamna hi a entawn tlak em em bawk a. Kum 10 dawn lai kan inkawm chhung khan a thinrim hi ka hre ngai lova, mi pawisawi a hlau in a mah a in thlahrung dek thin ani. Hetiang a ka thianpa fel tak hian min boral san tawh mah sela, keini a thiante rilru ah chuan UPEKA a ni kumkhua tawh dawn ani.

3 comments:

Post a Comment

About Me

My photo

Ka nu leh pa te fa nei lovin kum 10 chuang an awm hnu ah kei hi ka lo piang a. Fa nei thei tawhlo tura an ngaih hnu a ka lo pian leh avangin mi ten mak an ti hle. Tichuan ka lo thanglian ve zel a, tunah chuan ka upa ve tawh lutuk.

Online

Site Statistics

Follow by Email