Ka hmangaih ka fawp

He khawvel a kan lo pian chhuah hian siamtu chung Pathian in kan khawsak dan phung tur rel fel sa a nei thin a. Chung zingah chuan Pathian in mihring te min pek zinga ropui ber mai hmangaihna hian mi tin min fan a, min bual anih hi.

Hmangaihna hi tungcho a piang he khawvel a seilian mihring te chuan kan hringnun a kan tawng ngei ngei tur leh kan neih ngei ngei tur thil a ni a. Khawvela misual ber pawhin hmangaihna hi chu tlemte tal chu a nei ve ngei ang. Pathian in he khawvel ah hian chi tam tak thlaha awm turin min ruat a. Chuvang chuan mihring te inkar ah hian he hmangaihna ropui tak hi a dah a. Kan nun a bet tlat, kan pian tirh ata kan neih sa thlap a ni. Hmangaihna neilo mihring a awm theihloh a. Hmangaihna neilo a inhria pawhin hmangaih tur a neih loh avanga hmangaihna nei talo emaw a a inngaih vang chauh a ni. Kan hmangaih zawng erawh a inanglo thluah hlawm ang.

Hetiang anih avang hian Pathian in min pek angin kan rilru a kan hriatthiam hunah hmangaihna duhawm tak hi chawrchhuah tir thin a ni a. Chumi avang chuan he khawvel ah hian mi chihrang hrang kan lo awm phah a, kan khawvel in a tha lam zawng leh a chhe zawngin hma kan sawn char char ni. Nausen lo piang chuan hmangaihtu a neih loh chuan a thi mai thin. Khawvela misual ber pawh hian hmangaihtu a neih vang chauha sual thei ani tih hi hre mawlh teh se. Hmangaihtu neilo a inhria chuan a hre thelh duaih a ni. Nu leh pa hmangaihna a dawng lo anih pawhin khawi lai emaw a hmelhriat leh hmelhriat lemloh te hmangaihna a dawn vang chauha puitling thei a ni. HMANGAIHNA hi a lo va hlu tehlul em!!!!!

Kei pawh ka nu leh pa te hmangaihna azarah ka lo seilian ve zel a. Mihring ka ni a, ka famkim tawk bik lo. Chuvang chuan hmelma lian tak mai ka nei ta tlat mai. Hun reilo te hnu ah phei chuan he ka hmelma hi ka hnehloh em avangin a bawih ah ka tang a ni titih der mai a. Theihtawp in tal chhuah ka tum thin a, ka thei mai bik lo. Ka bei rei tial tial a, ka theilo tial tial thung. A chhan chu ka hriat miahloh in ka lo hmangaih reng tawh zawk vang ani.

Ka hmangaih tih ka inhriatchhuah meuh chuan a zun ah ka lo uai nghet hle tawh a. Tunhma ka nun dan tam tak te ka thlak a lo ngai ta bawk a. A duh dan dan in min herkual a, min sawisa kual ta thin a. A thu chu ka awih em em ringawt tawh mai. A zun a uai chu na tak ani. Amaherawhchu hetiang taka a zun a ka uai avang hian mak ve deuh mai chu vawi khat mah HMELTHA ka ti ngai lo. Heti chung hian ka duh em em a, ka ngai ngawih ngawih a, a tello chuan nikhat pawh rei ka ti thin. A zei em em chu a ni phawt mai.....

Hun a lo kal zel a, ka hmangaih a, ka thlakhleh a, a tello a ka awm theihloh tak chinah phei chuan ka taksa hriselna thleng in a lo tuar ta a. Amaherawhchu ka hmangaih em avang chuan ka mawhchhiat phal lova, amah avanga chutianga awm ani tih ka hre phal ngai lo. A tan chuan ka inpumpek a, kan in hmuh theihna tur anih phawt chuan engmah tih hreh ka nei ngai lo.

Ka hmangaih hmu tur chuan ruahsur hnuaiah zan khaw tairek ah pawh ka chhuak peih a. Ka damloh pawhin amah ka ngaih em avangin mi tirh tur remchang ka zawng a, amah hmuh dan tur ringawt ka buaipui thin a. Ka hriselna bakah ka sum leh pai thlengin min eihek mahse pawi tihna ka nei lova. Amah ka hmuh theihna anih phawt chuan sum sen ka hreh ngai lo.

Ka hmangaih chu chance ka neih tawh phawt chuan ka fawp ngei ngei thin a. Vawi khat mai duhtawk loin ka fawp nawn sek thin. Ka fawh avang chuan nuam ka ti a, ka taksa mamawh zawng zawng min pe in ka rilru a tinuam sawng sawng hian ka hre thin a ni.

Pathian thu chuan,"I hmelma te chu hmangaih rawh," min ti a. Chuvang chuan he ka hmelma lian ber, min tiche tu hi ka hmangaih a, ka fawp thin ani. Chu ka hmelma, ka hmangaih, ka fawh thin chu eng dang nilovin MEIZIAL hi a ni e.