Zawlnei in min tawngtai

Ka naupan lai hian tum khat chu ka damlo chiam mai a. Sentut ni chiah si lo hian ka taksa chu a sen chhuak vek a. Doctor ten vawi 24 jection a ngai an tih avangin ka mawngtam tetakte ah chuan min jection tan ta a. Naupang chumchiap tih tak ah chutia ni tin maia min han jection tak ah chuan ka mawngtam an jection na lam ke chu a lo na tan ta a, ka kal thei ta hauh lo mai a. Tichuan pawn lamah pawng lengchhuak theilo chuan ka thu ta chawrh chawrh mai a.
Chutia a na ka tih tak avang chuan min jection na chu ka mawngtam lehlam ah an sawn ta a. Chu pawh chu a na leh ta hle mai a. Tichuan thut pawh thu theilo chuan ka mu ta chawrh chawrh mai a. Ka la naupang bawk a, hrehawm ka ti ngei mai.Ka nu hian tuilum chi al hian min deh sak thin a, a nuam ve sawng sawng thei nia. Ka la hre reng zel.

Tichuan le, jection chu a zo ta a. Mahse that lam ka pan thei chuang hauh lo mai a. Ka thalo telh telh zawk amaw tih tur in ka awm a. Ka pa mangang chuan min paw ta nawlh a. Zawlsei khua, khaw thenawm lawk ah chuan zawlnei(?) Pu Pakama a awm a. Chumi chu min pan pui ta nal nal a. Zawlsei leh Khawbung inkar kawng hi Km 1 vel bawr lek ania. Ke pawhin rei kal a ni lem lo.Zawlsei kan zu thlen chuan zawlnei pa chu a lo tawngtai mek a, damlo amah lo pan tu an lo awm nual bawk a. Kan kal tih pawh hre miahlo chuan room atang chuan a tawngtai zawh ah chuan,"Khawbung pa kha lo kal teh se," a rawn ti a. Ka pa chu a va kal a. Pu Pakama chuan,"Nizan ah Lalpan in rawn kal tur thu hi min hrilh lawk a. I fapa damdawi tur chu Lakhuihthei a ni e," a ti a. Lakhuihthei van lai tak a lo ni si a. Pu Hrinzama chuan tetakte, a tang rah a lo nei hlauh mai a. Pu Pakama chuan Lakhuihthei hmin hrim hrim chu tetakte pawh nise a pawilo a a sawi avangin kan la ta a.

Khawbung lamah kan haw chho leh ta vang vang a. Kan thlen chuan ka nu in Lakhuihthei chu a siam nghal a. Ka ei ta a. Ka ei zawh hnu deuh lawk chuan ka thak chu a lo ziaawm chho tan ta mai a. Ni hnih hnu velah chuan ka dam chiang ta var mai a. Mahse ka mawng vel chu min jection na avang chuan a la na reng tho a. Hei vang hian kar khat lai chu ka la sil tho.

Tun thleng hian Lakhuihthei hi damdawi ah ka la hmang a. Ka damloh apiang hian lakhuihthei kan zawng a. Ka ei hnu ah ka dam ve leh mai zel. Mak ve tak chu a ni.

A tir in thu a awm

Ka Nu in sual in min pai thei lawk lo
Pathian thu hriltu ho tawngka "Ka nun sual in mi pai a," tih ang deuh khan ka nun sual in min pai thei lawk lova. Ka nu leh pa te hian fa an nei thei lawk lova. Kum 10 teh meuh fa neilo a an awm hnu ah a kum 11 na ah kei ve te hi Champhai Damdawiin ah ka lo piang ve hlawl mai. Rei tak fa neithei lo, fa awt em em a awm hnu a piang ka nih avangin min duat khawp mai.

Engtin nge ka lo pian tak
Ka pa hian High School ah zirtirtu hna a thawk ve a. Tichuan khawi khawi emaw a a thawh kual hnu ah Khawbung High School ah a thawk leh ta a. Hetah hian a pension thleng in a thawk ta a ni.

Khawbung a a thawh lai hian Khuangthing lam putar mihlim hi Congress tan campaing in Khawbung ah a lo kal a. Ka nu leh pa te nen la inhre miahlo kha kan inah a lo lut hlawl mai a. "Tu te nge in nih ka hre lemlo, mahse ka kalpel thei thlawt lo che u. Tawngtai a ngai tlat mai, enge in mamawh phei chu ka hre lem lova," tiin ka nu leh pa khawhar tak te bulah chuan a sawi a.Tichuan an in kawm chho zel a, fa nei theilo a rei tak an awm thu te chu an sawi chho ta zel a. Tichuan Khuangthing putar chu fa dil chuan a tawngtai ta a.
 
Chumi hnu chuan chanchin engmah an in hre zui ta lo va. Nikhat chu putar chu a lo kal leh nawlh mai a. Ka nu chuan chutih lai chuan a rai tih a la hre hauh lo. Putar chuan,"Naute a lang tlat. A hming ah Samuela a ni e," a ti a. Ka nu leh pa chu an lawm viau na in an ring ngam chiahlo a. Mahse a thi a lo hul takah chuan nau a pai ngei tih chu a chiang ta a. Ka nute i te ho chuan,"Hmeichhia anih leh Samueli kan ti mai ang chu," an ti fiamthu thin.

Tichuan nau neih a lo hun dawn chuan Champhai lamah nau nei tur chuan an kal ta a. Tichuan, January ni 19, 1985 zing lamah he khawvel a ka zinkawng zawh tan turin ka lo piang ve ta. Mipa ka lo ni kher bawk nen, ka pa lawm lutuk chuan a bul vela awm ho zawng zawng thingpui a khilai ta hlawm anih chu.

Ka hming phuah dan:
Ka han piang chhuak ta chu rei tak fa neilo a awm tih takah an lawmpui hlawm hle a. Ka hming phuah mawlh mai chu an in chuh nasa a. Champhai lamin Lalmalsawma tiin an phuah a, Khawbung lamah Lalnuntluanga tiin an lo phuah ve bawk a. Tichuan ka hming chu Khuangthing, Champhai leh Khawbung phuah la khawm in Samuel Malsawmtluanga an ti ta ani.

Ka ti tak tak tawh

Hun engemaw chen kalta atang khan Mizo Hlakungpui Mual website kan buaipui ve a. Tun hma in website leh blog te hi ka tlawh nasa in ka en ve nasa thin hle a. Mahse mahni a han siam ve mai nachang ka lohrelo pek a.

Hlakungpui website kan han siam zo va, rilru ah website ringawt a la lian a. Mahse website a ziah vek chi loh te a awm tak avangin Blog lam ka buaipui chho ve ta a. Ka blog hmasa ber chu www.samtea.wordpress.com hi a ni.

Tichuan ka han ti chho ve mawp mawp a. Mahse ka duh aiin ka tih pawlh hnem ta a. Tichuan, mahni duh anga designed a upload ve theihna tur lam ka zawng ta a. Xtreemhost lamah ka duh ang ka hmu ta hlauh a. Tichuan ka siam chho ve leh ta a. Mahse domain panngai nilo nafam chu duhthu sam lohna a nei leh ta zel a. Ka duh tha in ka duh tui telh telh bawk si a. Domain pangai ka lei ta rawih a. Ka tihsual a lei ah pahnih ngawt mai ka lei lehnghal a.

Tichuan, website pangai tak chu ka enkawl chho ve ta a. Mahse ka website a ka thun tel rem lemlo tam tak a la awm avangin ka website chu a nih na tur taka hman a a dang chu blog pahnih siam a tah chuan khung len vek ka rilruk ta a. Tichuan he blog hi ka lo siam ta a. Tun ami hi chu ka ti tak tak tawh dawn a. Ka website enkawl pahin heng blog pahnih te hi enkawl chhoh pah zel ka tum a ni.

A tawp ber ah chuan he ka blog min lo tlawh sak tu zawng zawng te chungah thinlung takin lawmthu ka sawi mawlh mawlh e.

Online

Site Statistics

Follow by Email

Contact Form

Name

Email *

Message *